Faina lama inelna hawn a ni

Sorkar laipui hmalaknaa ram puma faina lama inelna, Swachh Survekshan Grameen 2018 chu nimin khan UDPA minister Zodintluanga chuan nimin khan a pisaah a hawng. Zodintluanga chuan, bawlhhlawh a paihna hmunah chauh paihna hmun atana Aizawl khawpui an puan (littering free Aizawl) chu a kengkawhtu tur Aizawl Municipal Corporation (AMC) lamin an la kenkawh theih loh thu a sawi.

Swachh Survekshan Grameen 2018 hawnna inkhawm hi PHE secretary KT Beicho-a'n a kaihruai a; UDPA Minister chuan, Littering Free Aizawl atana dan siam chu Assembly House-ah pawm a nih tawh thu sawiin, "Rules-te pawh siam vek a ni tawh. Keini lam chuan nikum December aṭang khan kenkawh kan duh a, mahse, a kengkawhtu tur AMC lamin an la kengkawh thei lo," a ti.

Zodintluanga chuan, Aizawl faina leh thianghlimna chu AMC kutah a awm tawh thu sawiin, "Department lam pawhin kenkawh duh mah ila, kan kut a nih tawh loh avangin hma kan la thei lo," a ti a; Littering Free Aizawl kenkawh a nih hun chuan Aizawl khawpui a fai sawt tur thu a sawi.

Sorkar laipuiin fai inelna a buatsaiha Aizawl khawpui aia ti ṭhate chu Aizawl aiin a tak takah an fai bik loh thu sawiin Minister chuan, "Kan khawpui hi fai viau mah se, inelnaah hian fai ringawtin point a pu lo. Data thawn ṭhat leh a mi chengte ngaihdan a pawimawh a, hemi lamah hian kan hniam ṭhin. Tehnaah hian reporting-in 35% leh feedback-in 35% a puh a, a inkawpin 70% lai a tling. Chuvangin, ṭan kan lak a ngai," a ti.

Swachh Bharat Mission (Grameen) Mission Director-in a sawi danin, Swachh Survekshan Grameen inelnaah hian - khaw chhung, mimal in, sikul, anganwadi, sakhaw hmun leh vantlang hmun faina dinhmunin 30%; mipuite aw (feedback from citizen)-in 35% leh online report (data updation as per IMIS)-in 35% a pu dawn. Endik hna chu India ram pumah Hindustan Thompson Pvt.Ltd.-in an thawk dawn a ni.