MYC-in sipai training an buatsaih dawn

Mizoram Youth Commission (MYC) chairman Joseph Lalhim­puia, MLA chuan, kumin 2018 chu MYC-in Mizo ṭhalaite 'Sipaia luh rûnpui kum' atan an puang tih a sawi a; MYC-in sipaia lut duhte tan thla hnih awh training an buatsaih dawn tih sawiin, chuta lut tur chu Mizo ṭhalaite a sáwm.

MYC Chairman hian nimin khan a pisaah thuthar thehdarhtute kâwmin, Mizo ṭhalai a tam thei ang ber sipaia an luh theihna tura an ruahmannate a sawifiah a; October 3-6, 2018 chhungin Mizoramah Army Recruitment lian tham tak neih a ni dawn tih sawiin, "Kumin hi MYC-in Mizo ṭhalaite sipaia luh rûnpui kumah kan lo puan tawh avangin, sipaiah a tam thei ang ber an tlin theih nan written exam leh physical firness atan district khawpui tinah August thla tir aṭangin Pre-Recruitment Training kan buatsaih dawn a ni," a ti.

Joseph Lalhimpuia chuan, nikumah sipaiah Mizoramin quota 370 a nei chungin, mi 104 chiah an tling thei tih sawiin, "Kuminah hian eng zat nge quota kan neih dawn kan la hre lo a, sipaiah Mizo ṭhalai a za tél an luh theihna turin ṭan kan la dawn a ni," a ti a; sipaia luh tumte tana training an buatsaih turah chuan trainer ṭha tak tak an rawih dawn thu a sawi.

MYC Chairman sawi danin, MYC-in Pre-Recruitment Training a buatsaih tur hi Aizawl leh district khawpui tinah neih tur a ni a, ei leh in leh trainer rawihna atana senso phuhrûk nan Rs. 1,000 chawi a ngai dawn thung. Training-ah hian ṭhalaite chu physical fitness bakah, mathematics & reasoning, English, general knowledge & general awareness-te zirtir tum a ni.

Training-a tel duhte tana ngaih­venna hmun turte chu - Aizawlah MYC office leh Lunglei­ah MYC coa­ching centre (SSA hall) a ni a; dis­trict dang zawngah chuan SSA DPC office-ah a ni. A kal hmasa apiang lak tur a ni a, August 10, 2018 thleng registration tih theih a ni. Chutih rualin, medical test neih tur a nih avangin, medical test-a tling lote chu registration an tihsak thei dawn lo thung.

Indian Army-a hna lak turte chu - soldier general duty, soldier tradesman, clerk/storekeeper technical, nursing assistant leh soldier technical-te a ni.

Joseph Lalhimpuia chuan, Statff Selection Commission (SSC) pawhin Central Armed Police Force (CAPF)-ah constable (general duty) atan mi 54,954 a la dawn tih a sawi a, "Hetah pawh hian Mizo ṭhalai a tam thei ang ber an luh theih nan ṭan kan la dawn," a ti a; Mizo ṭhalaite chu luh tum turin a sáwm nghal a ni.

MYC Chairman sawi danin, SSC-in CAPF Constable (General Duty) Examination 2018 a buatsaih turah hian post 54,954 zinga 4,325 chu schedule tribe mipa tan leh 588 chu ST hmeichhe tana hauh a ni. Online registration hawn a ni tawh a, hei hi August 20, 2018 thleng hawn a ni dawn. Matric pass, kum 18-23 (ST tan 28) tan dil theih a ni a, exam centre chu Aizawl a ni ang.

SSC-in CAPF tribal a lak tur zat
1. Border Security Force (BSF) M - 1,341; H - 235
2. Central Industrial Security Forces M - 13; H - 0
3. Central Reserve Police Force M - 1,586; H - 12
4. Sahastra Seema Bal (SSB) M - 610; H - 159
5. Indo-Tibetan Border Police M - 366; H - 60
6. Assam Rifles M - 361; H - 115
7. National Investigation Agency M - 1; H - 0
8. Special Security Force M - 47; H - 7
(M - Mipa; H - Hmeichhia)