KHAWTHLIR
Hmanrua sem
Agriculture department chuan nimin khan Mamit IPR conference hall-ah Mamit district-a lo neitu thlan chhuahte hnenah Krishi Kalyan Abhiyan aṭangin hmanrua an sem a, Ministry of Rural Development-a chief economic adviser Seema Gaur-in a hmanpui. Hmanrua hi lo neitu 46 hnenah sem a ni.
Zirlai thar lawm
J Thankima College chuan nimin khan Lal Thanhawla Auditorium-ah zirlai thar lawmna hun, Freshers' Social Meet an hmang a, HTE minister R Romawia'n a hmanpui. R Romawia chuan, zirlaite chu sorkarah ringawt innghat lo a, mahni kutkea intodelh thei tura ṭan la turin a fuih. HTE Minister hian J Thankima College-ah hian Bachelor of Business Administration (BBA) zirna tur a hawng nghal a ni.
Sangha khawi zir
Lawngtlaia Fisheries department chuan nimin khan Lawngtlai BNRGSK Hall-ah RKVY Scheme 2017-18 hnuaia sangha khawitute tan Fish Farmers Training an buatsaih a, Lawngtlai DC N Chakhai-a'n a hmanpui. Training-ah hian sangha khawitute chu sangha khawi dan, enkawl dan leh thil pawimawh hrang hrang an zirtir a ni.
MiMIR thlirho
Serchhip District MiMIR Committee chu nimin khan district bawrhsap Sangchhin Chinzah hoin a pisaah an ṭhukhawm a, Serchhip district-a khua/veng 44-te'n MiMIR hnuaia project an thehluhte an thlirho a, a ti ṭha zual 20 an thlang a ni.
Dincham lawm
Excise & Narcotics department, Lunglei chuan nimin khan an conference hall-ah an dincham an lawm a, department-a thawktute bakah pensioner, Lunglei MJA member leh Lunglei District Court-a thawkte an tel. Excise & Narcotics dept., Lunglei hi July 26, 1983-ah din a ni a, thawktu 44 an awm mek a ni. January 2015-a MLPC Act hman anih aṭangin Lungleiah wineshop paruk leh zu card 17,459 a awm.