MSU hruaitute'n NIT bungrua an tichhia? NIT Dy.Registrar-in Police-ah FIR a thehlut

National Institute of Technology (NIT), Mizoramah Mizo Students Union (MSU) mi ṭhenkhat an kal a, bungraw ṭhenkhat an tichhia nia sawiin NIT-MIzoram deputy registrar (F&A) Lalthianghlimi Zote chuan nimin khan Bawngkawn Police Station-ah FIR a thehlut.

NIT Deputy Registrar-in FIR-a a ziah dan chuan, nimin chawhma dar 11 vel khan MSU hruaitu mi 15-20 vel chu NIT-Mizoram Director Prof. Rajat Gupta office-ah security guard phalna la loin an lût lui a, chutih lai chuan Director room-ah chuan Hostel Management Committee chairman Dr Bidesh Roy leh Mechanical Engineering department-a head of department (HoD) Dr Bachu Deb-te nen thil an sawiho mek a ni.

MSU hruaitute chuan Dr Bidesh Roy leh Dr Bachu Deb te chu chhuak turin an ti a; Department of Civil Engineering-a assistant professor Dr Bijayanda Mohanty chhawr a la nih reng chungchangah Director chu an chhuahchhàl a ni.

MSU hruaitute chuan NIT Director chu hnuaichhiah takin an ti a, a dawhkânte nawr sawnsakin, dawhkâna file-te an khawih a, video conferencing system-te pawh an ti­chhia niin a tarlang a ni a; thil thlen laia security guard-te luh tum pawh an lo dang nia tarlan a ni bawk.

Director office aṭanga an chhuah hnuah MSU hruaitute chu Department of Civil Engineering awmna, Zoramthanga building, Tourist Lodge bul, Chaltlangah kal lehin, Department of Civil Engineering assistant professor Dr Bijayanda Mohanty an luh­chhuah a; mahse, Bijayanda Mohanty chu a pisaah a lo awm lo hlauh a ni.

MSU hruaitute thil tih dan chungchangah hian NIT Deputy Registrar chuan nimin khan Bawngkawn PS-ah FIR a thehlut nghal a; police-te chu thil thlen dan chhui chiang a, dan anga hma la turin a ngen.

NIT-Mizorama an chêt dan chungchangah hian MSU president RB Lalmalsawma chuan, Department of Civil Engineering head of department (HoD) Dr Bijayananda Mohanty khawsak danah leh a zirtir danah zirlaite an lungawi loh thu MSU-in an dawn avangin hma an la a, NIT Director hnenah enquiry commission dina hma la turin a ngen tih a sawi.

MSU President tarlan danin, NIT hotute chuan Dr Bijayananda Mohanty chu a thiam lo nia hriain HoD a nihna aṭangin an dahthla a; mahse, Dr Mohanty chet zui dan aṭangin Enquiry Commision leh Director thutlukna leh hmalaknaah NIT zirlaite an lungawi theih loh avangin MSU chuan Dr Mohanty chu NIT Mizoram chhuahsan turin an ngen.

Dr Bijayanda Mohanty chu hun eng emaw chen a awm bo a, mahse, tun hnaiah a hna a rawn zawm leh a, zirlaite lakah a inhrosa nasa hle a; zirlaite chu an thlabár phah hle a ni. Chuvang chuan MSU chuan nimin khan NIT-Mizoram Director chu a office-ah an hmu a, Dr Bijayananda Mohanty chu hum tawh lo tur leh Mizoram a chhuahsan theih nana hma la turin an hriattir niin a sawi.