Science Centre din champha lawm

Mizoram Science Centre (MSC) nimin khan an din champha vawi 15-na an auditorium-ah an lawm a; khuallian, chief secretary Arvind Ray chuan, science leh mathematics thiamna lama hmasawnna a awm zel chu lawm­awm a tih thu a sawi.

Chief Secretary chuan, khawvel ṭhang zelah science thiamna a pawimawh zel tih sawiin, "UPSC civil service exam a tlingte pawh science background nei an tam tawlh tawlh a ni. Zirlai naupang zawkte'n awlsam taka science lam thil an hriatthiam zung zung a, class sang zawk an thlen hunah pawh tui taka an zir theih nan zirtirtuten ṭan an lak a ngai a ni," a ti.

Mizoramah science stream lama zir chhuak mi thiam tak tak an awm tawh tih sawiin Arvind Ray chuan, "Heng thiamnate hi kan ramin hma a sawn theih nan kan hman dan tur ngaihtuah chian a ngai. Hemi kawngah hian scientific officer-te leh Mizoram Science Centre a ṭangkai hle," a ti a; MSC chu Mizo ṭhalai science lama tuite'n tun aia nasa zawka an hman ṭangkai ngei a beisei thu a sawi.

MSC hi Directorate of Science & Technology leh Ministry of Culture hnuaia National Council of Science Museums (NCSM) ṭangkawpin July 26, 2003-ah an din a, kum 2017 khan Autonomous Government Institution-ah hlankai a ni. Tun dinhmunah forest gallery, fun science gallery, mini-planetarium, auditorium, 3D theatre, outdoor science park-te a awm.