MZP hruaitute'n Education minister an hmu

MZP hruaitute chuan nimin khan School Education minister H Ro­hluna an hmu a; zirtirtu sem rual chungchang leh lumpsum grant-in-aid school-te harsatna tawh chungchang an sawipui.

MZP tarlan danin, MZP hruaitute hian School Education Minister chu thingtlang lamah zir­tirtu an tlem thu leh khawpui lama an tam thu te, zirtirtu thingtlang leh khawpui lama sem rual a ngaih thute an sawipui a; hemi chungchang hi kar thar lamah School Education department official-te leh MZP hruaitute nen document kimchang enho a, sawiho ni se, an ti.

Lumpsum grant-in-aid school-te'n dinhmun sang zawk a awm an phût vanga harsatna an tawh mek leh zirlaite'n zirna an chhunzawm theih loh chungchangah MZP hruaitute chuan, zirlai ṭhahnem takin an tawrh nasat tawh avangin a ṭul anga ngaihtuah turin H Rohluna chu an ngen a ni. Minister chuan, sorkarin sum a neih loh avangin lumpsum aided school-te thil phût chu sorkarin a tihlawhtling thei rih lo tih a lo hrilh.

Lumpsum grant-in-aid school-te thil phût chungchang chu nimin vek khan MZP hruaitute chuan chief minister Lal Thanhawla sawipuiin, zirlai ṭhahnem takin an tawrh dan chu ngaihven turin an ngen a; Chief Minister chuan, lumpsum grant-in-aid school-te chu dinhmun sang zawkah dah duh viau mah se, sorkar sumin a tlin rih loh thu a lo hrilh a ni.