Serchhip VC VII-in ambulance an pe

Serchhip VC VII chuan nimin khan Serchhip District Hospital hnenah ambulance an pe. Serchhip VC VII hian AOC Veng leh Chanmari Veng a huam a; ambulance atana Maruti Eeco van chei nan Rs. 6,15,376 an séng a ni.

Ambulance inhlanna inkhawm hi Chief Medical Officer (CMO) pisa conference hall-ah neih a ni a, Serchhip VC VII president H Lalthianghlima'n Serchhip CMO Dr Laldawngliana Sailo leh medical superintendent Dr ZD Lalmuanawma te hnenah ambulance chabi a hlân.

H Lalthianghlima chuan, VC inthlana candidate an nih lai aṭangin a thawhpuite nen langtlang sorkar din an intiam tih sawiin, "Min thlan tlin khan veng chhunga mi harsa zual chhungkaw pangate in saksak ngei kan tum a ni.  VC chuan excluded fund te, State Finance Commission aṭangte leh MGNREGA material component-te kan dawng ṭhin a, heng kan sum hmannate hi mipui hriat turin kan tár chhuak a, gram sabha-ah lehkhain kan sem ziah bawk," a ti.

Serchhip VC VII President chuan, an intiam angin mi harsa zawkte in saksak turah pahnih an sa tawh tih a sawi a, "Mahse, Covid-19 hripuiin min nuai a, Serchhip District Hospital ngei pawhin ambulance a mamawh belh hle tih kan lo hria a, pawisa kan la neihte chu ambulance atan hman ṭha kan ti tlang leh ta rih zawk a, kan lei ta a ni," a ti a; an thil tih tum chu Health Minister pawh an hriattir thu a sawi. Ambulance inhlannaah hian VC aiawh te, sorkar official dangte an tel a; Dr Laldawngliana Sailo leh Dr ZD Lalmuanawma te pawhin thu an sawi a ni.