Doctor's Day hman theih a ni lo

Nimin, July 1 kha Doctor's Day a ni a, mahse, Covid-19 vangin hman theih a ni lo. Indian Medical Association (IMA), Mizoram Branch president Dr Rosangluaia chuan, day pualin thuchah a tichhuak a, an member-te chu mi tam tak tan malsawmna thlentu an ni thei tih hre thar turin a chah.

Dr Rosangluaia chuan, Covid-19 vangin Doctor's Day chu kum dang ang­in an hmang thei lo tih sawiin, "Kum danga kan hman ṭhin aia ṭha leh ṭangkai zawk mahin kan hmang tawh. IMA Mizoram Branch member tinte'n Covid-19 hripui do nan kan theih ang leh remchan ang zelin thâ kan thawh hlawm. Chawlh­kar thum zet chu IMA member 461-te'n Aizawl lamah community quarantine centre 220 zet leh home quarantine eng emaw zat chu mahni inséngsoin ṭhahnemngai takin sorkar kan vilpui a ni. District dangah pawh kan member-te he hri léng buaipui hian rim leh hah takin hna an thawk a ni," a ti.

Sorkar pui turin mi ṭhahnemngaite sum thawh khawm hmangin IMA-in nurse pathum leh laboratory technician 10 an rawih thu sawiin IMA President chuan, "Face mask, glove leh hand sanitizer eng emaw zat kan sem bawk. Kan inpekna avangin quarantine centre-a awm te, task force-te leh mipuite'n min thlamuanpui hle a, kan inlungrualzia leh min mamawhtute  tana kan inpekzia a lang chiang hle," a ti a; lungrual taka an thawhho chuan IMA member-te'n thil ropui tak an tih theih thu a tarlang.

Doctor’s Day hi India ramah Dr BC Roy pian ní leh thih ní - July 1-ah hman ṭhin a ni a; khawvel pumah doctor-te'n mimal leh vantlang tana an inpekna chawimawina ní atan hman ṭhin a ni.