Oil man tihniam turin President ngen

All India Congress Committee (AICC) ruahmannain Mizoram Pradesh Congress Committee (MPCC) chuan nimin khan India President hnenah petrol leh diesel man sang zel tihniam turin an ngen a, an ngenna chu Aizawl DC kaltlangin an thawn.

MPCC chuan, India ramin sum leh paia harsatna nasa tak a tawh mek laiin BJP kaihhruai sorkar laipuiin petrol leh diesel man nasa takin a tisang chho tih an tarlang a, "Hei hian mipuiah nghawng ṭha lo tak a nei mek a ni," an ti.

Congress party tarlan danin, kum 2014-a BJP-in sorkarna an siam ṭan tirh laiin petrol litre khatah excise duty (chhiah) Rs. 9.20 lâk a ni a, diesel litre khatah Rs. 3.46 lak a ni. Tunah chuan excise duty chu petrol-ah Rs. 23.78 leh diesel-ah Rs. 28.73 a ni tawh a, diesel-ah 820% leh petrol-ah 258%-in a sang tawh tihna a ni. BJP kaihhruai sorkar kum ruk chhunga petrol leh diesel aṭanga chhiah lâk zat chu cheng vbc. 18,00,000 a tling tawh.

Covid-19 leng vangin khawvel­ah tuialhthei thlit fîm loh (crude oil) man nasa taka a tlahniam chung­in BJP sorkarin petrol leh diesel man a tihniam chuang lo. June 24, 2020 khan tuialhthei thlit fîm loh man chu barrel khatah US dollar 43.41 (Rs. 3,288.71) a ni a, barrel khatah litre 159 awmin, litre khat man chu Rs. 20.68 tihna a ni. Chuti chung chuan India rama diesel man chu litre-ah Rs. 80 a la tling. Khawvelah tuialhthei thlit fîm loh man nasa taka a tlahniam chunga BJP sorkarin petrol leh diesel man a tisang lui zel chu mipui rawkna dik taka an ngaih thu tarlangin MPCC chuan, "Mizo­ramah pawh BJP-in NDA huanga­ an thawhpui MNF an sorkar miau avangin thil man sang vanga harsatna kan tâwk nasa hle," an ti.

Congress party chuan, thla thum inkhàrkhip tawh chhungin mipui sum lak luh nasa taka a tlakhniam laiin, thil man nasa takin a sang niin an sawi a, "MNF sorkarin thil man sang lutuk control turin hmalakna pakhat mah a nei lo a, mipuiin kan tuar tlawk tlawk a ni," an ti. Sorkarin thil man sang thunun tura hma a lâk loh laiin, task force-te'n an huam chhungah an thunun thei tih sawiin, chu chuan MNF sorkar chak lohzia a tilang niin an sawi.