COVID-19: Mizoram dinhmun Hripui vei 67 hmuh belh a ni
November 12, Ningani khan Mizoramah Covid-19 vei mi 67 hmuh chhuah a ni a, nimin khan hripui laka fihlim tawh mi 53 chhuahtir an ni thung.
Covid-19 vei Ningania hmuh chhuahte chu mipa 46 leh hmeichhia 21 an ni a; ZMC laboratory-a hmuh mi 42, TrueNAT-PCR hmanga Lungleia hmuh mi pakhat leh Rapid Antigen Test (RAT) hmanga hmuh mi 24 an ni.
IDSP-in nimin tlai dar 5 thlenga dinhmun a tarlan danin, nimin khan hripui laka fihlîm tawh mi 53 chhuahtir an ni. SRH-ZMC aṭangin mi pali, Durtlang BSUP CCC aṭangin mi 17, Champhai CCC aṭangin mi 31 leh Lawngtlai CCC aṭangin mi pakhat an chhuak.
Mizoramah Covid-19 positive mi 3,309 hmuh chhuah a ni tawh a, mipa 2,458 leh hmeichhia 851 an ni. Nimin tlai dar 5 thleng khan mi 2,792 (84.38%) chhuahtir an ni tawh a, mi pahnih (0.06%) thi tawhin, enkawl mek mi 515 (15.56%) an awm.
Mizorama hripui vei hmuh tawhte zinga mi 1,507 chu Mizoram chhunga kái an ni a, mi 1,802 chu state páwn aṭanga rawn lut an ni.
November 12, Ningani khan Mizoramah swab sample 1,160 endik a ni a; chu'ngte chu ZMC-a endik 460, TrueNAT-PCR hmanga district palia endik sample 54 leh, RAT hmanga district 10-a endik sample 646 a ni.
Sorkar thuchhuah tarlan danin, ZMC laboratory-ah RT-PCR hmangin Covid-19 vei mi 42 hmuh chhuah niin, mipa 25 leh hmeichhia 17 an ni a; kum 14-75 inkar, Aizawl district-a swab sample lâk vek an ni. Mi 40 chu Mizoram chhunga kái an ni a, mi pahnih chu state páwn aṭanga rawn lut thar an ni thung.
Mizoram páwn aṭanga rawn lut tharte chu - Armed Venga mipa kum 24, Indian Air Force-a mi, Bangalore aṭanga rawn haw leh, Falkland Venga mipa kum 57, West Bengal aṭanga rawn lut an ni a; inkhung hrang lai niin, Covid-19 symptom an nei lo ve ve. Tualchhunga káite dinhmun chu table-ah tarlan a ni.
TrueNAT-PCR hmangin Lunglei Civil Hospital laboratory-ah hripui vei mipa pakhat, kum 53 mi hmuh chhuah a ni a; tun hnaia Uttarakhand aṭanga rawn lut, Lunglei Tourist Lodge quarantine facility-a inkhung lai niin, symptom a nei lo.
RAT hmanga Covid-19 positive hmuh chhuah mi 24 zinga a tam zawk, mi 21 chu Mizoram páwn aṭanga rawn haw an ni a, tualchhunga kái mi pathum an awm. State pawn aṭanga rawn lut mi 21 zinga mi 17 chu police, tun hnaia Bihar Assembly inthlana duty rawn haw an ni.
Aizawla RAT hmanga sample endiknaa hripui vei hmuh chhuah MPS officer mipa pahnih - Mission Venga kum 43 leh Republic Venga kum 43 mite chu Bihar inthlana duty rawn haw hlim an ni a; home quarantine lai, symptom nei lo ve ve an ni.
Lengpui Airport screening point-ah state pawn aṭanga thlawhtheihna hmanga rawn hawte endiknaah West Phaileng mi hmeichhia kum 25 leh 44 mi, Kolkata aṭanga haw leh, Tlangnuam, Aizawla mipa kum 52 mi, Imphal aṭanga hawte hmuh chhuah an ni a; an vaiin symptom an nei lo vek.
RAT hmangin Mamitah Luangpawla awm 4th IR police kum 24-58 inkar mi pariatin Covid-19 an vei tih hmuh chhuah a ni a; an vaiin Bihar inthlana duty rawn haw hlim niin, an zinga pathumin symptom an nei. Thenzawla Police Training School-a awm police pasarih, mipa kum 30-56 inkarte pawhin hripui an vei tih hmuh niin, Bihar inthlana duty tho an ni a, symptom nei lo vek an ni.
Tuivai screening point-ah Manipur aṭanga rawn haw mipa pakhat, kum 42 chu Covid-19 positive a ni tih hmuh a ni a; amah hi Armed Venga mi niin, symptom a nei lo.