Remna Ni hi mi zawng zawng ta a ni - Deputy Chief Minister

Deputy chief minister Tawnluia chuan June 30, Thawhlehni zana MZP-in Remna Ni lawmna an buatsaih a hmanpuinaah thu sawiin, "Remna Ni hi mi zawng zawng ta a ni," a ti.

Tawnluia chuan, Mizoram mipuite Remna Ni chibai bûkin, "Remna Ni hi Mizo national movement-in a hrin chhuah a ni," a ti a; ‘Mizoram buaina’ tia sawi ṭhin chu helna leh kawhmawh bàwlna vanga awm a ni lo a, hnam movement a nih thu leh, inremna chuan Mizoram chu dinhmun sang zawkah a dah a, chu chuan political leh administrative thil a ken tel thu a sawi.

Tawnluia chuan, rem­na chu mipui thawh chhuah a nih angin thu­thlung pawh Mizoram mipui zawng zawng ta a nih thu sawiin, "Chumi ang chuan tunah hian Mizoram pawh kan awm mek. He remna hian mi zawng zawng a inremtir a, tun hmaa inrem ngai lo leh inhuate pawh a inremtir a, phuba lakna leh thung­rulhna lam thinlung awm loin vawiin thleng hian Mizoram chu ram rálmuang berte zingah chhiar theih a lo ni ta," a ti.

Hnam movement leh inremna chuan Mizote chu khawvel hriatah a pho langin a chawisang nia sawiin Tawn­puia chuan, "Zahawmna leh ngaih pawimawhna a hlawh phah. Mizote hi hnam dangte min chîmralna leh rahbehna lakah a humhim kan ti lo thei lo," a ti a; Mizo ram leh hnam chhana an nunna hlântu hnam martarte chibai bûk turin mipui a sáwm.

Deputy CM sawi dan­in, India leh MNF in­biakna chu a tìrah prime minister Indira Gandhi hmalaknain bul ṭan a ni a, Indira Gandhi chu October 1984 a a thih hnuah a fapa Rajiv Gandhi, PM-in inbiakna bul a ṭan leh a ni.