CM-in Bawrhsap Pisapui kâng a tlawh

Chief minister Zoramthanga chuan December 18, Inrinni khan Aizawl Bawrhsap Pisapui kâng chhia a tlawh a; PWD hotute chu uluk taka a hmunhma zir chiang a, sak ṭhat theih dan tur ngaihtuaha ruahmanna siam turin a hrilh.

CM Zoramthanga chuan, Aizawl Bawrhsap Pisapui chu Mizo tan ro hlu a nih thu leh a kang chhia chuan rilru a tihrehawm a, hmuh hrehawm a tih thu Instagram-ah a tarlang a, "DC Office-a thawktu zawng zawng ka tawrhpui a, an hna pawimawhte khaihlak loa a rang thei ang bera an chhunzawm thuai theihna turin Mizoram sorkar chuan ruahmanna a siam nghal thuai dawn... MINECO-a MultiLevel Car Parking building thara lo inbéngbel lailawk tura hriattir an ni e," a ti.

Chief Minister hian sorkar hotu dangte nen DC pisa sawnna tura ruahman lailâwk MLA hostel hlui an tlawh a, Secretariat building bula Multi Level Parking sak zawh tawh, vawiina hawn tum an tlawh nghal bawk. Multi Level Parking hi UDPA hnuaia sak a ni a, GAD kuta hlan nghal tur a ni.