Kisan Credit Card Camp huaihawt

Champhaia Lead Bank, AH&Vety leh Fisheries department-te chuan December 18, Inrinni khan Farkawn leh a chhehvela sangha khawitute leh ran vulhtute tan Farkawn community hall-ah Kisan Credit Card (KCC) Camp an huaihawt a, Champhai DC Maria CT Zuali'n a hmanpui.

He hunah hian AH&Vety department kaltlangin KCC loan dilna 73 leh Fisheries department kaltlangin dilna 26 pek chhuah a ni. KCC loan hi kum nga chhunga rulh tur a ni a, 7%-in a pung. Loan hi Rs 3,00,000 thleng lak theih a ni a, Rs 1,60,000 hnuai lamah security leh guarantor a ngai lo.

Maria CT Zuali chuan, loneitute'n hma an sawn nan leh tam zawk an thar theih nan KCC loan siam a nih thu sawiin, "Mipuite'n chiang zawka an hmelhriat a, a nihna tur taka an chhawr ṭangkai ka duh. Loan diltute'n ngun taka inngaihtuahin, hna thawh tak takna tur leh hlawhtlinpui ngei thei turin in rilru siam ang che u," a ti.