KHAWTHLIR

Thisen pe
KṬP, Republic Veng Branch chuan Inrinni khan Synod Hospital tan an kohhran hall-ah thisen unit 49 an pe a, petute mipa 46 leh hmeichhia pathum an ni a; KṬP, Muallungthu Bial pawhin ZMC Blood Bank tan thisen unit 43 an pe a, petute mipa 32 leh hmeichhia 11 an ni. Inrinni vek khan ṬKP, City Church unit-in Aizawl Civil Hospital blood bank-ah thisen unit 12 an pe a, petute mipa 11 leh hmeichhia pakhat an ni a, mimala a thlawna pe mi 17 an awm bawk. Champhai Bethel Veng PYD (NEI)-in District Hospital-ah unit 13 an pe a, petute mipa pariat leh hmeichhia panga an ni a; Kolasib Red Ribbon Club-te'n District Hospital-ah unit riat an pe a, individual donor pali an awm bawk.

Puanṭhui zirna
Assembly deputy speaker Lalrinawma, Tuikum bialtu MLA chuan December 18, Inrinni khan a bial chhung Chhuanthar Tlangnuam Branch MHIP Inah MHIP buatsaih puanṭhui zirna a hawng. Puanṭhui zirna hi bialtu MLA-in puanṭhui khawl panga a pek hmanga kalpui a ni a, thla thum chhung zel zir tur niin, mi 11-in an zir mek a ni.

Ruaitheh lo turin ngen
Lunglei DC Kulothungan A chuan Lunglei district-a kohhran hrang hrangte chu Krismas leh kum thar vuakvêt laiin biak-ina inkhawm piah lama kohhran anga puipunna leh ruaiṭhehte ti lo turin a ngen.

MLA-in hawng
Aizawl West-III bialtu MLA VL Zaithanzama chuan a MLA fund hmanga sak Maubawk Branch YMA Property House cum Committee Room thar hawng. In hi Rs 5,00,000 chuang hmanga sak a ni.

Morgue van hlan
Aizawl South-II bialtu MLA Lalchhuanthanga chuan December 18, Inrinni khan a bial chhung Salem Veng Branch YMA hnenah ruang phurhna (morgue van) a hlân. Salem Veng hian an veng chhung bakah, veng páwna mitthi leh damlo buaipui ngai an neih fo avangin Lalchhuanthanga hian MLA fund hmangin Pik-up motor a leisak a ni.