DC pisa kan chhan chhui chhuah phût

Mizoram Pradesh Congress Committee (MPCC) chuan thuchhuah siamin, Aizawl Bawrhsap Pisapui a kâng chu pawi an tih tak zet thu an tarlang a, kângmei chhuah chhan a rang lama chhui chhuah an phût.

MPCC chuan, sorkar thuchhuahin a tarlan danin, zing dar 3:15 velah Election Branch aṭangin kângmei a chhuak tih hriat a nih thu tarlangin, “Zing dar 4:10-ah Fire & Emergency Service hriattir a ni chauh hi a makin Mizoram mipui ngaih a ṭha lo hle. Kângmei chhuah hun leh Fire Service hriattir hun inkar rei lutuk avang hian thil dik lo eng emaw a awm ngei nia rinna mipui rilruah a awm lian hle a ni,” an ti.

Congress party chuan, Home minister Lalchamliana’n DC pisa kan chhan chhui chiang tura magisterial inquiry din a nih tur thu a sawi chu lawmawm an tih thu tarlangin, “Kângmei chhuah chhan felfai taka chhui chhuah a nih ngei theih nan a rang lama hma la turin kan phût a ni,” an ti.

Sorkar thuchhuahin a tarlan danin, Aizawl DC office-a document hluite digitisation kalpui mek ni mah se, record leh lehkha hlui DC Archive Room-a dah 95% vel chauh dah ṭhat a la nih thu tarlangin MPCC chuan, “Tun hnaia record leh lehkha pawimawhte chu a kângral vek niin tarlan a ni,” an ti a; minister of state Robert Romawia Royte-in document pawimawh 98% vel scan hman tawh avangin kângmei laka a him deuh vek avanga a lawm thu social media-ah a puanzar thung thu an sawi bawk.