NHM hnuaia thawkte nuar mek zel ; Hriselna lama inenkawlnain a tuar
National Health Mission (NHM), Mizoram hnuaia thawkte chu Mizoram sorkara an lungawi loh avanga December 17, 2021 aṭanga an nawrh ṭan hnuah an la nuar chhunzawm zel a, hmun hrang hrangah damdawi-in lama inenkawlna leh hnathawhin a buaipui phah. Hetih lai hian, sorkar hotute aṭangin thu lawmawm an hmuh avangin nawrh an tihtawp dawn leh dawn loh nizan khan an ngaihtuah.
National Health Mission Employees Union (NEUM) president Malsawmtluanga Hauhnar hnen aṭanga thu dawn danin, NHM hnuaiah hian damdawi-in hrang hrang, sub-centre, health and wellness centre leh emergency service leh pisaa thawkte an tel a; an vaiin mi 2,200 chuang niin, an zingah doctor 120 vel leh nurse 400 vel an tel. Doctor zingah hian specialist doctor an awm nual bawk.
Thu dawn danin, NHM hnuaia thawkte an nawrh avang hian Mizorama damdawi lama inenkawlnain harsatna a tawh phah a; Champhai District Hospital-ah chuan nuar zingah hnim hlum lam thiam specialist doctor an tel avangin inzai hrim hrim tih theih a ni rih lo.
December 17 aṭangin Covid-19 vei dam tawh chhuahtir zat tarlana puanzar theih a ni lo chhunzawm zel a; hemi chungchangah hian IDSP state nodal officer Dr Pachuau Lalmalsawma chuan zawhna chhangin, discharge zat update tur leh tichhuak turin hma an la mek tih a sawi a, chhuak tur ang chu an chhuak zel tho tih a sawi bawk.
Hetih lai hian, Health minister Dr R Lalthangliana chuan Kolkata aṭanga December 18, Inrinnia Aizawla a haw veleh a pisaah NEUM hruaitute a kâwm nghal a, sorkarin theihtawp a chhuah dawn thu sawiin, nawrh titawp turin a ngen.
NEUM President hnen aṭanga thu dawn danin, Inrinni tlaia Health Minister nena an inkawmnaah IPR minister Lalruatkima, MLA Dr ZR Thiamsanga, Health secretary R Lalramnghaka leh department hortu dangte an tel.
Dr R Lalthangliana chuan, NHM hnuaia thawkte thil phut tihlawhtling turin theihtawp a chhuah dawn tih sawiin, nawrh titawp turin a ngen a; NEUM hruaitute erawh chuan pawlin an ngaihtuah phawt tur thu an sawi. Inrinni zan khan an ngaihtuah nghal a, Health Minister hoa meeting minutes chhuak phawt se, tiin thu an dah a, meeting minutes chu nimin khan sorkarin a tichhuak nghal. Nimin vek khan Chief Minister hoin sorkar hotute'n an sawiho bawk.
Malsawmtluanga Hauhnar chuan, an inkawmna leh meeting minutes-ah thu lawmawm a awm thu sawiin, "MR kan bill ve theihna turah harsatna a awm lo tura sawi a ni a, transfer TA a rem turah kan ngai a, hlawh pawh regular taka min pek theih an tum. NHM hnuaia thawkte dah ngheh erawh chu vawi leh khata tih nghal huk theih a ni lo a, keini pawhin hrethiam tho," a ti.
NEUM President chuan, an nawrh avangin hmun hrang hrangah health service-in harsatna a tâwk nasa tih sawiin, "Kan nawrh zel chuan Essential Services Maintenance Act (ESMA) puan khumte pawh sawi rîk a awm niin kan hria. Mipuiin an tawrh nasat lutuk kan duh bik lo a, zaninah (Pathianni zan) pawlin kan sawiho ang," a ti a; thu lawmawm an dawn avangin an nawrh chu an tihtawp mai theih thu a sawi a ni.