HSSLC exam chhunzawm a ni

Higher Secondary School Leaving Certificate (HSSLC) Examination 2020 chu Covid-19 hri léng leh inkhàrkhip vanga chawlhsan lailawk a nih hnuah, nimin khan chhunzawm a ni a; HSLC (Compartmental) Exam 2020 pawh buatsaih a ni bawk.

HSSLC exam hi MBSE buatsaih a ni a, a chhunzawmna hi Mizorama exam centre 79-ah buatsaih a ni. Zirlai, mahni exam centre pangngai pan thei lote chu centre pan awlsam berah exam chhunzawmtir an ni. Exam hi vawiin leh naktukah chhunzawma zawh a ni ang.

Nimina exam chhunzawm aṭanga exam tur subject la awm leh zirlai zatte chu - Economics-ah zirlai 2,662, Chemistry-ah 2,277, Sociology-ah 1,641, Computer Science-ah 184 leh Home Science-ah 262 an ni. HSLC (Compartmental) exam chu district headquarters 11-ah buatsaih a ni thung a, nimin khan theory paper exam niin, vawiinah practical exam neih a ni ang. Tun ṭum compartmental exam-ah hian zirlai 143 an awm. Covid-19 hripui lakah zirlaite an him theih nan exam centre hrang hrangah zirlaite chu exam hall-a an luh hmain thermal screening tihsak hmasak vek niin, a inhlat thei anga ṭhuttir an ni a; hmai tuamna vuahtir an nih bakah, kut silna chhawp an ni.