MNF-in Bawrhsap pisa kâng pawi an ti

MNF chuan thuchhuah siamin, December 17, 2021 zinga Aizawl Bawrhsap Pisapui kâng chu pawi an tih thu an tarlang a, “Office hmunhma leh bungraw pawimawh tak tak a kâng ral hi pawi kan tiin, kan ui tak zet,” an ti.

Kum 130 chuang ding tawh bawrhsap Pisapui chu British-in Mizoram a awp laia sak a nih thu tarlangin MNF chuan, “Sorkar (ministry) eng emaw zat lo ding tawhte’n tidanglam duh loin ṭhiah an ui vek a. A ngai ngaia la awmtir, hmun leh in hlu (heritage) tling a ni,” an ti a; a chhunga thil hlui hlu tak takte leh sorkar bungrua leh file pawimawh zawng zawng hun rei lo te chhunga a kâng ral chu an ui tak zet thu an tarlang.

MNF chuan, Bawrhsap Pisapui a kâng tih hriat a nih veleh minister Lalchamliana, Lalruatkima leh Robert Romawia Royte te a hmuna an kal chu fakawm an tih thu sawiin, “Aizawl DC office suan luhna tur remchang an ngaihtuah nghal a, Old MLA Hostel, Khatlaa office awm rihna tur Assembly Speaker Pu Lalrinliana Sailo-in a tifel nghal a; Dy. CM leh minister Pu Lalchhandama Ralte leh Dr K Beichhua ten a hmunah kal chilhin an en thlithlai nghal a ni,” an ti.