Chetsualnaah mi pathum thi

Nimin khan electric man vangin Lengpui khaw mi pahnih an thi a; December 18, Inrinni zan khan lirtheia chetsualnaah mi pakhat a thi bawk.

Nimin chawhma dar 11 vel khan Lalmuanpuia (35) s/o H Lalhlira leh Lalrinkima (20) s/o Lalrinmawia, Lengpui khua ve ve chu Sairang khaw chhung electric ban phun ṭhat an tumna lamah electric hrui an hawlh fuh avangin electric current-in a man a, an thi.

Lengpui Branch YMA secretary Lallawmkima hnen aṭanga thu dawn danin, Lalmuanpuia hi electric current-in a manna hmunah a thi nghal a, Lalrinkima erawh chu Sairang damdawi-in thlenpui a nih hnuah a thi. An ruang hi nimin khan postmortem nghal a ni a, vawiinah vui an ni ang.

December 18, Inrinni zan dar 8 rîk hma deuh khan Ṭhuampui leh Bawngkawn inkar Red Rose kawngpuiah Ṭhuampui lam pana tlan scooty leh Bawngkawn lam pana tlan bike an insû a, scooty khalhtu Andy Rualkhuma (31) s/o C Laldinthara, Ṭhuampui a thi. Ṭhuampui YMA hruaitu K Lalrimawia hnen aṭanga thu dawn danin, Andy Rualkhuma hi Aizawl Civil Hospital-a ambulance driver a ni a, an chetsual hnuah damdawi-in panpui nghal ni mah se, a hliam tuar loin a thi a ni.