Mizoramah ni hnih chhungin Hripui vei 228 hmuh belh a ni

Mizoramah Covid-19 vei December 17, Zirtawpni khan mi 111 leh December 18, Inrinni khan mi 117 hmuh chhuah a ni a, ni hnih chhungin in 228 hmuh a ni. NHM hnuaia thawkte nawrh vangin Inrinni leh nimina Covid-19 vei dam tawh chhuahtir zat tihchhuah a ni lo zui zel a, mitthi tarlan a ni lo bawk.

Covid-19 vei December 17-a hmuh chhuahte chu mipa 49 leh hmeichhia 62 an ni a; ZMC laboratory-a hmuh 13, TrueNAT hmanga hmuh 11, RAT hmanga hmuh 86 leh FIA hmanga hmuh pakhat a ni. December 18-a hmuh tharte chu mipa 57 leh hmeichhia 60 an ni a; ZMC-a hmuh 28, TrueNAT hmanga hmuh panga, RAT hmanga hmuh 83 leh FIA hmanga hmuh pakhat an ni.

IDSP record angin, Mizoramah Covid-19 vei 1,39,455 hmuh chhuah a ni tawh a, mipa 67,272 leh hmeichhia 72,183 an ni a, mipa aiin hmeichhia 4,911-in an tam zawk.

National Health Mission (NHM) hnuaia thawkte December 17, Zirtawpni aṭanga tiam chin awm loa an nawrh avangin Covid-19 vei dam tawh chhuahtir zat ni thum chhung tarlan a ni tawh lo a, hripui vei hmuh chhuah thar zat erawh chu la tihchhuah zel a ni.

December 17, Zirtawpnia Covid-19 vei hmuh thar mi 111 zingah symptom nei mi 59 an awm a, mi 52 erawh chu symptom nei lo an ni.

Zirtawpnia swab sample endikah positivity percentage 10% aia a sanna district panga a awm a, a sanna ber Mamit district-ah 100% a ni a, Serchhip district-ah 46.15%, Khawzawl district-ah 14.41%, Lawngtlai district-ah 12% leh Saitual district-ah 10.84% a ni. Champhai leh Kolasib district-ah hripui vei hmuh a ni lo.

December 18, Inrinnia Covid-19 vei hmuh thar mi 117 zingah symptom nei mi 64 an awm a, mi 53 erawh chuan symptom an nei lo thung.

Inrinnia swab sample endikah positivity percentage 10% aia a sanna district pali a awm a, a sanna ber Kolasib district-ah 100% a ni. Positivity rate 10% aia sanna district dangte chu Champhai 15.66%, Khawzawl 14.81% leh Serchhip 14.42% a ni. Siaha district-ah hripui vei hmuh a ni lo a, Mamit district-ah sample endik a ni lo.

Kum 2011 chhiarpui aṭanga chhûtin, Mizorama Covid-19 vei hmuh tawh 1,39,455 chu mi 1,000 zelah hripui vei mi 127 an awm ang a ni a; mi 1,00,000 zela Covid-19 vangin mi 48 an thi tawh ang a ni tih sorkar thuchhuakin a tarlang.