Study group zirnaah MLTP Act aia MLPC Act hlawhtling ti an tam zawk

Mizoram Liquor Prohibition & Control (MLPC) Act zirchiangtu Study Group-te'n zawhna an zawh zingah MLTP Act aia MLPC Act hlawhtling zawka ngai an tam zawk.

Study Group-te hian MLPC Act nge MLTP Act hlawhtling zawka an hriat Aizawl khawpui chhunga kum naupang lam deuh aṭanga upa lam deuh mi 672 an zawt a, mi 291 chuan an ngaihdan an tarlang lo.

Mi 101 (15%) chuan MLPC Act hlawhtling zawkah an ngai a, mi 76 (11.3%) chuan MLTP Act hlawhtling zawkah an ngai thung. Act pahnih hi a hlawmchham ve vea ngai mi 204 (30.4%) an awm.

MLTP Act hlawhtlinga an ngaih leh ngaih loh zawhna chhangtu mi 672 zinga mi 286 chuan an ngaihdan an tarlang lo.

Mi 104 (15.5%) chuan MLPC Act chu hlawhtling lo hulhualah an ngai a, mi 136 chuan a hlawhtling loah an ngai. Mi 16 (17.3%) chuan MLPC Act chu hlawhtlingah an ngai a, mi 30 (4.5%) chuan chiang taka hlawhtlingah an ngai thung.

MLPC Act hman a nih avanga zu an in tam phah leh phah loh zawhna pawh mi 672 hnenah zawh a ni a, zawhna an chhan dan aṭanga a lan danin, 126 (18.8%) chuan an in tam phah lo a, mi 92 (13.7%) chuan an in tam phah an ti thung. Zawhna chhangtu zinga 221 chu zu in ngai lo an ni a, mi 233 chuan ngaihdan an nei lo.

Thla khat chhunga zu leina atana sum sen zat zawhna chu mi 207 in an chhang a, Rs. 100 aia tam lo mi pariatin an seng a, a bak zawng chuan Rs. 100 chung lam an sen thu an tarlang thung.

Zu tel loa nuam chen a theih leh theih loh zawhna chu mi 672 in an chhang a, a tam zawk 521 (77.6%) chuan zu tel loa nuam chen theih a nih thu an tarlang. Mi 47 (7%) chuan zu tel lo chuan nuam a chen theih lohah an ngai a, 104 chuan ngaihdan an nei lo.