BPL awm lohna khaw pangate Cheng nuai 40 ṭheuh pe dawn

Planning & Programme Implemen­tation department chuan thuchhuah siamin, Mizorama below poverty line (BPL) awm lohna khuate tan sorkarin 'Participatory Community Development Project for BPL Free Vilages' a ruahman thu leh, chu'ng khuate chu NEP hnuaiah cheng nuai 40 ṭheuh hna thawhna tur pek a nih dawn thu a tarlang.

Planning department chuan, Mizo­ramah hmasawnnate kawng hrang hrangin chak takin a kal mek nia sawiin, "BPL chhungkua pawh an tlem zel a, BPL chhungkua 21% aia hniam lo ṭhin kha, BPL Baseline Survey 2016-ah chuan 19.63% chauh a ni tawh," an ti a; Champhai district-a khaw panga - Pàmchung, Rabung, Tlangmawi, Chawngtlai leh Riangtlei khuate phei chu BPL awm lohna khua an nih tawh thu an sawi.

Planning department tarlan danin, 'Participatory Community Development Project for BPL Free Villages' hmang hian BPL awm lohna khaw pangate chu NEDP hnuaiah cheng nuai 40 ṭheuh pek a ni dawn a; a hman dan tur ngaihtuah turin an khuaah V/C kaihhruainain Village Development Committee (VDC) din a ni anga, V/C president chu chairman tur niin, member-ah YMA, MUP leh MHIP aiawhte leh prominent citizen an awm dawn a ni.

VDC chuan an khaw tana hmasawnna thlen tur, eizawnna siamsak thei tur leh sum hnár siam tur project an siam ang a, an project-te enpui leh a tihhlawhtlinna atana ṭanpui turin Champhai DC kaihhruaina hnuaiah District Planning Committee din a ni.