Sorkar tihtêt telh telh kan tum - Finance Minister

Finance minister Lalsawta chuan, Mizo­ram sorkarin sorkar tihtêt telh telh a tum thu leh, ṭangte ṭanpui chu tunlaia sorkar thil tum laimu a nih thu a sawi.

Lalsawta hian nimina Johnson College-in an college-a an kum 25-na, silver jubilee an lawmnaah thu sawiin, "Tun hmain sorkar hna­thawk pakhat tal chhungkaw pakhata an awm chuan chhungkaw pangngaiah kan ngai ṭhin. Sorkar hnathawk thei chin chu sorkar hna a thawh theih hmasak ber thawk turin kan innawr liam ṭhin. Mahse, tunah chuan sorkar hnain min daih tawh lo," a ti.

Finance Minister chuan, sorkar hna a tlem ta chu Mizote tan ṭhatna leh hmasawnna a ni zawk nia sawiin, "Tumruhna leh thil dang ngaihtuah chhuah theihnate a siam a, kan mithiamte pawh sumdawnna kawng tharte dapin an intêl khawm phah a, mi hlawhtling tak takte an lo chhuah phah a ni," a ti a; Mizo­ram sorkarin sorkar (go­vernment) tihtût telh telh a, governance tihlen telh telh a tum thu a sawi.

Sorkar chu a vengtu leh kaihruaitu a nih thu sawiin Lalsawta chuan, "A ngaihna hria leh ṭang theite kutah hmasawnna leh changkanna kawnga hmalak theihna pek tam tial tial kan tum a ni," a ti.

Bungkawn College leh Khatla Art & Com­merce-te insuihfin aṭangin August 24, 2002-ah Johnson College a piang a, tunah hian thawktu, teaching staff 28 leh non-teaching staff 13 awmin, department parukah zirlai 930 an awm mek a ni.