Police-in Document lem siam ṭhin man
Aizawl SP C Lalzahngoa chuan thuchhuah siamin, document hrang hrang - certificate, marksheet, driving licence, etc. lem siam ṭhin mi pathum tun hnai khan an man thu a tarlang.
Aizawl SP tarlan danin, M.A certificate lem Mizoram University-ah hman tum an awm tih an dawn avangin police-te'n an chhui zui nghal a, certificate lem neitu K Lalmuanawma, Edenthar Veng chu chhui chhuakin, thu zawhfiah a ni. K Lalmuanawma chuan, M.A certificate chu computer a zirpui Joseph Laldampuia (25) s/o F Lalmungliana, Tuikual South leh an zirtirtu pakhatin Rs. 5,000 chawia an siamsak thu police a hrilh.
Certificate lem siam chungchang chu chhui zuiin, a inhnamhnawih pathum - Joseph Laldampuia leh K Lalmuanawma bakah, Roluahpuia (27) s/o J Lalkima, Chawlhmun, Aizawlte chu police-te'n an man a, Court phalnain nimin khan jail-ah dah luh an ni. Document lem siamtute hian original document chu scan-in an tidanglam nia hriat a ni.
MA certificate bakah hian, marksheet leh driving license-te pawh an siam zual tawh a; document lem siamtute chu Indian Penal Code (IPC) hnuaiah kum sarih chhung jail-a tàn bakah, pawisa chawi tura hrem theih an ni.