CADC hotute anticipatory bail phalsak

Special Judge (Prevention of Corruption Act) chuan, Chakma Autonomous District Council (CADC)-a chief executive member (CEM) hlui leh Mizoram sorkara minister of state hlui Dr Buddha Dhan Chakma leh CADC sorkar hotu eng emaw zatte anticipatory bail dilna chu July 26, Ningani khan a phalsak.

CADC sorkara hotu eng emaw zat, CEM hlui te, executive member ni lai leh ni tawhte chu CADC sum tam tham tak eirua puh an nih avangin Anti Corruption Bureau (ABC) chuan thubuai an ziak lut a ni. Eirua puhte hi man an la ni lo a, man an nih hmain Special Court (PC Act)-ah July 23, 2018 khan anticipatory bail an dil a; Court chuan July 26 khan anticipatory bail chu a phalsak ta a ni.

CADC sorkar sum eirua puhte ukil JC Lal­nunsanga chuan, eirua puhte'n sum an tihchingpen zawng zawng chu an rûl vek tawh a, sorkar pawhin November 20, 2017 khan thuchhuah a siam bakah, liability clearance certificate pawh pek vek an ni tawh niin Court a hrilh a, document-te a thehlut bawk.

Thu dawn danin, Court-ah hian JC Lalnun­sanga chuan, eirua puhna thubuai chupolitics thil vang a nih thu te, FIR thehluh a nih hun laiin CADC hotute chu sum tihchingpena puhna a awm tawh loh avangin case ziah luh theih a nih tawh loh thute a sawi. Sorkar ukil R Lalremruata erawh chuan, CADC hotute'n sorkar sum an pe lêt leh chuan sum an tichingpen ngei a ni tih a tichiang niin a sawi thung a; thil an tihsual ngeia a lan avangin anticipatory bail dilna chu hnâwl a dil thung.

Hetih lai hian, Bud­dha Lila leh a thurualpui ṭhenkhat chu Mizoramah an awm lo a, ACB-in thu zawhfiah turin an zawng mek a ni.