KHAWTHLIR

Bail dilna hnâwl
Excise & Narcotics assistant commisioner H Rongura'n Court-a anticipatory bail a dilna chu Special Court (Prevention of Corruption Act) chuan July 26, Ningani khan a hnâwl. Thu dawn danin, H Rongura hi sorkar sum Rs. 1,73,48,365 (nuai 173.48) tihchingpenah puh a ni a, a lakah Anti Corruption Bureau (ACB) chuan thubuai (ACB case no. 5 of 2018) an ziak lut a ni.

Thisen pe
Govt. Aizawl College NSS leh Red Ribbon Club chuan nimin khan an college-ah blood donation camp an huaihawt a, zirlai mipa 126 leh hmeichhia 23-te'n Aizawl Civil Hospital tan thisen unit 149 an pe.

Governor Secretary
School Education director K Lalthawmmawia, IAS chu a hna chelh mek bakah, Secretary to Governor hna thawk tel tura tih a ni. Hemi chungchangah hian DPAR chuan nimin khan notification a tichhuak.

Zirlai thar lawm
Hnahthial College chuan nimin khan an college auditorium-ah zirlai thar lawmna leh zir chhuakte thlahna hun an hmang a, bialtu MLA John Siamkunga'n a hmanpui. Hnahthial College-ah hian department pasarihah zirlai 120 an awm mek a ni.

MiMIR thlirho
Mipui Mamawh Inṭawm Ruahmanna (MiMIR) hnuaia intihsiaknaa Aizawl district-a khua/veng hrang hrangte'n project an thehluh chu nimin khan additional DC John LT Sanga hoin thlirho a ni a, project neitute'n an project-te a lem nen an sawifiah. Intihsiaknaah hian project 70 a lut a, nimin khan a ti ṭha zual 19 thlan a ni a, 19 aṭangin a ti ṭha ber thlan a ni ang.

ILP nei lo man
Siaha-a police-te chuan July 26, Ningani zan leh nimin zing khan Siaha khawpuiah hnam dang, Inner Line Permit (ILP) nei lo leh ILP thi tawh dap chhuah rûnpui an nei a, ILP nei lo hnam dang 39 an man. ILP nei lo an mante hi an chungah dan lekkawh a nih theih nan nimin khan Siaha District Court-ah hruai an ni.