Tuichang lei dawh a muang ti

Tuichangral Zirlai Pawl (TCZP) chuan thuchhuah siamin, Tuichang lei dawh mek chu hna a muang hle nia sawiin, "Tun thlenga hmasawnna hmuh tur a awm lo hi pawi kan ti hle," an ti.

TCZP chuan, "Tuichang lei dawh hna hi December 1, 2016-a thawh ṭan tawh a ni a, December 1, 2018-a zawh tura ruahman a nih laiin, hna thawhna hun tlemtê chiah a awm tawh tihah pawh a ban tak ngial pawh phun a la ni lo hi pawi kan ti hle a ni," an ti a; mawhphurhna chelhtute tan zah ngawih ngawihna tham nia an hriat thu an sawi.

TCZP tarlan danin, Tuichang lei hi Sadguru Engineers & Allied Service Pvt.Ltd., Guwahati-in an dawh a, sum ruahman zat chu nuai 754.75 a ni. Lei chu Prestressed Congcrete Girder bridge-a siam tur a nih laiin, Build Up Girder bridge-a thlak leh tum a nia an hriat thu sawiin, an tih kawi vel dan chu Mizoram sorkar, PWD leh Sadguru Engineers & Allied Service company-te in­thlahdah lutuk vanga an ngaih thu an tarlang.