MJA-in Press Enclave sakna tur sum Pe chhuak vat turin thuneitute an ngen

Mizoram Journalists' Association (MJA) general Headquarters chuan thuchhuah siamin, Aizawla Press Enclave sakna tur sum chu North Eastern Council (NEC)-in pek tura a pawm (retained) tawh laiin, tun thlengin sum pek chhuah a la ni lo tih an tarlang a; sum pe chhuak thuai turin sorkar an ngen. A hnuaia mi hi MJA Gen.Hqrs. thuchhuak chu a ni.

MJA-in sanction thuai turin a ngen

Prime minister Narendra Modi kaihhruai BJP sorkarin MJA-te dilna ngai pawimawha Press Enclave sakna atan NEC-ah cheng vbc. 10 a remti (retain) hi MJA chuan lawmawm a ti hle a. Press Enclave sakna tur phei hi chu NECPAC remtih (approve) tawh niin MJA chuan a hria a, Press Enclave hi Mizoram chanchinbumite mamawh leh nghahhlelh em em a nih avangin rang taka sanction a nih theih nana hma min lakpui turin MJA chuan sorkar laipui thuneitute a ngenin a beisei a ni.

NEC-in project a hréng khawtlai em ni?

BJP kaihhruai NDA sorkar hian hmarchhak bial hmasawnna ngai pawimawh hle nia insawiin, NEC pawh a sîksawi a. Hetih lai hian, Mizoram aṭanga project thehluh, NEC-in pek tura a pawm (retained) tawhte pawh tun thlengin pawisa sanction a la awm lo. Mizoram phei chu Assembly inthlang mai tur kan ni a, tuna NEC-in project a retain-te hi inthlan puan hnan a nih chuan a sukuk zo vek dawn tihna a ni. NEC-in project a retain tawh si, tun thlenga pawisa a la sanction loh zingah hian journalist, mahnia in leh lo nei lote chenna tur MJA Press Enclave pawh a tel a, project retain tawh si, sanction loa hei chen hrên khawtlai a ni hi a mak viau mai. NDA/BJP-in an hrên khawtlai vanga a sukuk a nih chuan journalist-te rilru a na hle dawn a ni.

NEC-in sum la pe chhuak lo

NEC-in kum 2017-18 chhunga project a retain tawhte chu tun thleng hian pawisa sanction a la ni lo a, Central hotute thu lo chuan NEC

Secretariat-te'n engmah an ti ngam loa hriat a ni. Project retain tawh, la sanction loh zingah hian MJA-in Press Enclave a sakna tur pawh a tel a, sanction vat a nih loh chuan Mizoram inthlan puan hunin a rawn khahchilh mai ang tih MJA member-te chuan an hlau hle a ni.