MNF-in sikulte harsatna kan chingfel ang - Dr R Lalthangliana
MNF vice president Dr R Lalthangliana chuan, lumpsum grant-in-aid higher secondary school pakuate adhoc grant-in-aid dinhmuna dah phûtna vanga sikul khâr leh kawngpui dan a ni chu pawi a tih thu a sawi a; MNF a sorkar hunah chuan sikulte harsatna chu an duh dan ang taka an chingfel vek tur thu a sawi bawk.
Dr R Lalthangliana hian nimin khan Tarpho khuaa vantlang inkhawmah thu sawiin, adhoc aided dinhmuna hlankai phût mektu sikulte chu MNF sorkar laia an ruahmante a nih thu a sawi a, "Lo sorkar zel ni ila chuan, kum nga chhungin dinhmun sang zawkah kan hlang kai fai vek ring. Tun sorkar hian an ti lo a nih pawhin, MNF sorkar tharah chuan an harsatna hi an duh dan ang takin kan chingfel ang," a ti.
R Lalthangliana chuan, Congress sorkarin world class education sawiin, mithiamte chu sum tam tak sênga ruaiin Education Reform Commission din mah se, tun thlengin zirtirtu indaih lohna a nasa hle niin a sawi a, "MNF sorkar lai khan Mizoram Education Act kan siam a, chumi hnuaiah dan ṭha tak tak 10 kan siamte chu Assembly-ah pawh kan pass vek a ni," a ti a; chutah chuan zirtirtu transfer & posting rules pawh an siam a, mahse, Congress sorkarin a hmang zui ta lo tih a sawi.
MNF sorkar hmasain Mizoram Education Act an siam tawh chu MNF a sorkar leh hunah an hmang dawn tih sawiin Dr Thangtea chuan, "Zirtirtu indaih lohna phuhru turin zirtirtu thar tam tak kan la ang a, thingtlang zirtirtu indaih lohna hmunah dahin, pension an hnaih tak tak hnuah khawpui zawkah kan sawn chauh ṭhin ang. Natna leh harsatna bikte erawh ngaihnathiam an ni ang a, zirtirtu indaih lohna hi kan phuhru ngei dawn a ni," a ti.
MNF Vice President chuan, "MNF sorkar laia adhoc aided school, tun thlenga government-a hlân kai loha la awm, result nei ṭha bawk site chu MNF sorkarah kan hlang kai dawn. Sorkar enkawl ni lo, khawtlangin a enkawl sikulte dinhmun hi ngun takin kan enfiah ang a, sorkarin a puih theihna turin aided school-ah hlankai kan tum ang," a ti a; SSA leh RMSA zirtirtu leh CSS hnuaia Hindi zirtirtu bânte leh hlawh lak hleih theih lohte a awm lohna tura hma an lak tur thu a sawi bawk.