DC tel loa Ṭawi biala candidate dah lo tura Congress hriattirna a ṭul anga bawhzui tum

Saitual District Implementing Demand Committee (SDIDC) chuan nimin khan thuchhuah siamin, DC tel loa Ṭawi constituency-a candidate dah lo tura Congress party an hriattir tawh chu a ṭul anga an bawhzui dawn thu leh, kumina Independence Day-ah pawh Saitualah politician tír lo tura sorkar an ngen nghal thu an tarlang.

SDIDC chuan, tun hnaia Lungawi lohna Ni an hman ṭumin, an bial­tu MLA R Lalzirliana, Home minister chu a bial­te thlavang hauh nan leh mipui hmangaihna vang­in minister a nihna aṭanga châwl turin an ngen tih sawiin, "Amah pawhin Saitual district hi tun term chhunga a function lo a nih chuan bàn thlenga a huam thu a lo sawi tawh ṭhin angin, a báng ngam turah kan ngai," an ti a; chutih laiin, tuna sum harsatna chhuanlama a hmang leh si chu kum 20 chhung rorelna ṭhut­thlenga dahtute a hmangaih lohzia lantirtua an ngaih thu an sawi.

Kum 10 chhung Home Minister bial an nih chhungin Sairualah department hawn belh leh department awm sa tihchangtlun (upgrade) a awm lo tih sawiin SDIDC chuan, "Building luah mang loh tlem azawng party a duhsak zualte'n an sa a, chu chu kan hmasawnna ve a ni... Tun­ah hian Khawzawl leh Hnahthialah sub-treasury hawn tuma ruahman mek a ni a, science zirna pahnih hawn belh tum a ni bawk. Hengahte hian Home Minister bial chu rêpin kan awm leh dawn ta a ang hle," an ti.

SDIDC chuan, Saitual bial mipuite chu an ã reng tawh dawn lo tih sawiin, "DC tel lo chuan Congress party hian Ṭawi constituency-ah candidate rawn siam lo turin kan hriattir tawh a, an rawn siam lui a nih chuan a ṭul ang zela hma la tur kan inruahman. Kum 2018 Independence Day-ah pawh thu lawmawm a keng lo chuan Saitualah khuallian tur politician tír lo turin kan ngen nghal bawk," an ti a; sorkar chuan thil thleng thei a hre chiang tâwk tura an ngaih thu an tarlang bawk.