Zodintluanga'n kháwl leia pe loin, sumin pe zawk se min tibuai lo tur - MNF

MNF party chuan nimin khan thuchhuah siamin, Cong­ress Legislature Party (CLP) leader Zodintluanga Ralte-in Lunglei Civil Hospital atana kháwl a lei chuan mi a tihbuai thu leh kháwl leia pe loin, sumin pe zawk se mi a tihbuai loh tur thu an tarlang.

"Party tin aiawh kal khawm­te'n an hlawh aṭanga 30% ṭheuh leh an MLA fund aṭanga nuai 50 ṭheuh thawh an rél a. Chutiang tak chuan Pu Zodintluanga leh a party-te hian ti vein, eng nga ti nge an ṭhian­te thawh ang hian an thawh ve mai loh, tih hi zawhna lianpui a ni," MNF chuan an ti.

MNF thuchhuah chuan, "Bial bik tan tia kháwl manto leh buaithlak zet mai ama thua a lei a, a hûng ta ruau mai hian min tibuai zo ta a nih hi. Ama mimal pawisaa a lei chu ni se thu hran a ni a, a ṭhiante zawng zawngin an thawh ṭheuh MLA fund aṭangin thawh ve duh loin a lei a ni leh nghal," a ti a; MLA tinte'n Covid fund-a mipui­te tan thawh loin, anmahni bial bik tan hman vek an duh ṭheuh niin a tarlang.

MNF chuan, "Mi pakhat hian 'Kohhrana ka thawh tur hi thawhlawm ipa rawn pe lut loin, kan sande sikul pawl bik ṭhut nan sofa set ka rawn lei zawk e' tiin biak-in veranda-ah rawn hûng ta se, kohhran committee an buai khawp ang," an ti a; "Pu Zodintluanga pawh hian an pawl tana sofa set leia biak-in bathlâra rawn hûng tawp lo hian, kohhran mipui zawng zawngte tih dan angin thawhlawm ipa daha kohhranah an rawn pe mai ang hian pe ve mai se chu kan buai lo ang maw le," an ti bawk.