Zo Heritage Centre dinna tur enfiah

Tourism minister Robert Romawia Royte chuan nimin khan Samtlang khaw ram, Mualkawia Zo Heritage Centre dinna hmun tur a enfiah. Minister hi bialtu MLA Prof. F Lalnunmawia, Mizo Cultural Organisation (MCO) hruaitute leh Samtlang khawtlang hruaitute'n an ṭawiawm.

Rober Romawia Royte chuan, Mizoram sor­karin Mizo hnam hrang hrangte hnam ziaráng lanna tur Zo Heritage Centre bakah hmarchhaka hnam hrang hrangte ziaráng lanna North East He­ritage Centre-te dah khawm tum a nih thu a sawi a, "Sum leh hmunhma awm dan azirin Asia rama hnam hrang hrangte ziaráng lanna tur Asian Heri­tage Centre pawh ruahman tel a ṭhain ka hria," a ti.

An thil tum chu thil lian tham leh hnam khawih thil a nih avangin a hmunhma tur pawh Aizawl hnaih si-ah, zau tham tak an zawn thu sawiin Minister chuan, "Zo Heritage Centre hi tourist-te hîpna a nih piah lamah, Zo fate insuihkhawm nan leh inpumkhat nan a pawimawh a, Mizoram sorkarin a ngai pawimawh hle," a ti a; centre din nan foreign funding beisei a nih thu a sawi.

Aizawl South-III bialtu MLA Prof. F Lalnunmawia chuan, Zo Heritage Centre din tumna a awm chu lawmawm a tih thu sawiin, "Ka bial chhungah awm ngei thei se ka duh. A ṭulna ­apiangah Tourism Minister leh department puih ka inhuam a ni," a ti.