Kuhva hâl vangin FIR thehluh a ni Dan phal loh thil dang a awm nge awm lo enfiah tura hlàn thlâk a ni - Champhai DC

December 18, 2021 (Inrinni) zan khan Kelkang dáia Champhai DC-in kuhva rah a man sa chu hâl a ni a, hemi chungchangah hian kuhva neitu Lalhruaitluangi, Chaltlang Lily Veng, Aizawl chuan Champhai Police Station-ah FIR a thehlut. Hemi chungchang hi police-in an chhui mek.

Lalhruaitluangi chuan December 18, 2021 zan dar 8 vel khan Kelkang dáiah a kuhva truck paliin an phurh chu Champhai DC Maria CT Zuali leh sorkar official-te'n lo tidingin, motor pathum aṭangin kuhva ip 150 an hlángthla a, hlànthlâkna hmunah an hâl nghal niin FIR-ah a tarlang; lirthei khalhtute phone leh chabi a laksak niin a ziak bawk.

A kuhva chu ram dang aṭanga lak luh a nih leh nih loh pawh enfiah hmasa lo leh a neitute hriat loha hâl a ni chu an hrethiam lo hle tih tarlangin Lalhruaitluangi chuan, a neitute hriat loh leh kuhva chu foreign origin a nih leh nih loh enfiah hmasa loa hâltu leh lirthei khalhtute mobile phone leh chabi chhuhsaktu chungah dan anga hma la turin Champhai PS-ah FIR a thehlut a; kuhva chu cheng nuai 15 vel hû a nih thu a tarlang.

Champhai PS officer-in-charge (OC), case investigating office (IO) ni bawk Vanlalthanga chuan, FIR thehluh a nih angin thubuai pathum - IPC Section 435 (mi bungraw hâlsak), IPC Section 427 (mi bungrua cheng 10 aia tam man tihchhiatsak) leh IPC Section 341 (dan loa driving license leh mobile phone laksak) tlawhchhanin thubuai a ziak lut a; dan angin chhui mek a nih thu a sawi.

Thu dawn danin, kuhva rahte chu truck pakua hmanga phurh a ni a, truck pali manin, truck panga erawh chu an man hman lo.

Hemi chungchangah hian Champhai DC Maria CT Zuali chuan zawhna chhángin, December 18 zana kuhva mante chu dan phal loh thil dang (contraband) a awm em tih enfiah tura hlàn thlâk a nih thu a sawi a, "Truck panga man hman loha chhuakte hi kan ûm zui a, mahse, kan man hman lo. Nimin (Pathianni)-ah pawh niléngin kan zawng leh," a ti a; police an hrilh hnuah an chin hriat zui a la nih loh thu a sawi a ni.

Champhai Bawrhsap chuan, kuhva neitu nia sawite chu mi hran zel an ni tih sawiin, "Driver-te kan zawhin Zonunsanga, Ruantlang ta an ti a, way bill-a inziak chu Mami Store tih a ni a, a neitu nia inchhála FIR thehluttu chu Lalhruaitluangi, Chaltlang Lily Veng a ni thung," a ti a; kuhva man sa zingah nizan lamah ip pakhat rûkbo a nih thu a sawi.

Bawrhsap chuan, kuhva an mante chu dan phal loh thil dang a awm leh awm loh enfiah a nih hnuah hlan chhâwn a ni dawn tih a sawi a; tuna kuhva phurtu lirtheite kawngpui pangngai zawha an kal chungchang chu a hriatpui loh thu te, dan loa Myanmar aṭanga lâk luh kuhva mante lak chhuah leh zel nia hriatna a awm thu leh a mantu tur berte rin zawh lohna a awm thute a sawi bawk.

Thu dawn danin, dan loa Mizorama kuhva lak luh leh sumdawn chu Champhai Bawrhsapin a khap mek a ni a, kum 2019 aṭangin khap ṭan a ni. A hma chuan kuhva rahte chu kawngpui pangngaiah kalpui loin, kawng dangah kalpui a ni ṭhin a, mahse, December 14, 2021 zan aṭang khan kawngpui pangngaiah phurh ṭhin a ni. Kawngpui pangngaia an kal hnuah ni khatah kuhva phur truck 25 an kal ṭhin a, December 16 aṭangin truck 30 kaltir ṭhin a ni.

December 18 zana kuhva man phurtute chhiah pekna lehkha (tax invoice)-a a lan dan chuan, truck-te chuan kuhva ip 180 an phur a, kuhva man chu kg. khatah Rs 20 angin an sawi. Open market-ah kuhva chu Vairengteah kg. khat man Rs. 295 vel a ni a, chumi ang chuan Inrinni zana Kelkang dáia man hlut zawng chu cheng nuai 42 vel a nih laiin, tax invoice-ah chuan cheng nuai 3 vel man anga tarlan a nih avangin Mizoram sorkara chhiah lut tur chu Rs 7,200 chiah a ni.