Aizawl bazar a lûn ṭan Sumdawngte'n zan curfew an tuar

Krismas a lo hnai leh ta a, Aizawla bazarte pawh a lûn leh ṭan tawh hle. Covid-19 hripui avangin kum 2020-ah Krismas bazar a awm lo a tih theih a, kum 2021-ah chuan Krismas bazar-in ngai la awh pha chiah lo mah se, mipui nawlpui an bazar chhuak leh ta. Hetihlai hian zan lama curfew puan a nih avangin sumdawngte chuan harsatna an tawh thu Vanglaini an hrilh.

Aizawla bazar lian ber New market leh a chehvelah mipui an ṭhahnem leh tawh hle a, a hmuna kal Vanglaini palaiin a hmuh danin mipuiin thawmhnaw an lei nasa a, ṭhalai rual thingpui dawra (restaurant) a huhoa chawl hmuh tur an tam a, Krismas thawmhnaw lei tura naupangte nena chhungkuaa chhukte pawh hmuh tur an awm.

Aizawl Krismas bazar
New Market-a sim card, ear phone, bluetooth speaker leh thil dang ak kuala sumdawng pakhat chuan, "Mipui an rawn chhuah tam hrim hrim chuan keini thil zawrh pawh hi hralhna a kal ve zel, Krismas lam thil zuar lo mah ila mipui an chhuah tam chuan inhralhna chu a awm," a ti.

Thawmhnaw dawr neitu Thianghlimi chuan, "Bazara mipui veivak en hi chuan hripui avanga inkhung lai nen chuan a inthlau a, inhralh tak hi chu kum dang chu kan la phak lo nasa hle a, amaherawhchu inhralh miah loa kum hnih dawn kal tawh keini sumdawnna ang chi tan chuan lawmna tur lam a ni," tiin Vanglaini a hrilh.

Restaurant neitu pakhat chuan Vanglaini hrilhin, "Kum hnih dawn hripui avangin kan inhawng mumal thei lo a, dawr luah man pek ngai nen kan tuar na hle a, tuna chawl tur mipui kan nei ve ta hi kan lawm khawp mai. A chang chuan ṭhutna leng lote pawh an awm ve leh tawh a, hei hi hun rei tak kan lo nghah tawh kha a ni a, a lawmawm duh khawp mai. Chutih rualin kum 2019-te nen chuan khaikhin chi pawh a la ni lo, a la inthlau hle a ni," a ti.

Hmeichhe incheina dawr nghaktu Hmangaihi chuan, "Bungraw lak dawnah Covid a reh dawn nge dawn lo a hriat si loh avangin kum dang angin bungrua kan nei lo a; nimahsela mipui nawlpui an han bazar leh ṭan takah chuan bungrua kan nei tam lo hi kan inchhir lek lek a ni. Chutih rual chuan tunah hian bungrua la khawm ila, inhralh si lo ila Krismas dawn loah inhralhna a vang si a, sumdawng tan chuan he hripui hian hisap hi a la tibuai chhunzawm zel a, hripui len hma leh len hnu hi chu kawng engkimah a inthlau a ni," a ti thung.

Millennium Centre
Aizawla thawmhnawa sumdawnna hmunpui pakhat Millennium Centre-ah pawh mipui an ṭhahnem leh ṭan tawh a, Krismas thawmhnaw bakah a kaihhnawih thil dangte pawh an hralh leh ṭan. A building chhunga restaurant-te a lûn leh tawh a, a kawt zawlah ei tur zawrhna hrang hrang a inhawn leh tawh bakah a chung zawl (roof top) lamah a hranpain Krismas bazar hawn a ni bawk.

Dawr nghaktu Tlankima chuan, "Mipui nawlpui tak tak chu an bazar lem lo a, chutihlaiin ṭhalai rawn vak chhuak hrim hrim hi chu an ṭhahnem khawp mai. Hripui avanga inkhung ning tawh rawn leng khawthawng pawh an ang a, inhralh lamah chuan Krismas lohlai ai chuan kan hralh ṭha ngei a, kum dang Krismas bazar nen chuan a la inang lo hle," a ti.

Lalhmai chuan, "Kum dangah chuan gate-a lut tur intlar ngai, a chhungah pawh innek luih luih leh inven ngai reng ang kha a ni a, tunah hi chuan mipui tam dan pawh a nuam tawk vel a ni. Thingtlang lam hi an rawn bazar vak lo a ang a, tun hma kha chuan December 10-20 inkar velah Aizawl pawn an bazar nasa a, Aizawl hi chu a dawn hnaiah te hian an lang tam ṭhin a, December 10 chhoah kha chuan mipui an la vang pharh a, tun hnaiah chuan kan ziaawm ve leh ta hret," a ti.

Zan curfew leh sumdawngte
Millennium Centre Dawrkai Association hotu H Lalnunsiama chuan, "Zan curfew hi keini sumdawng tan chuan thil pawi tak a ni. Dawr inhawng thei si loin kum khat leh a chanve chuang zet dawr luah man kan chawi char char a, kan han inhawng ṭan a, Krismas kan nghahhlelh ve nen keini inhralh ṭhat hun berah zanah kan inhawng ṭha thei lo a, kan tur nasa hle a ni," tiin Vanglaini a hrilh.

A sawi zel danin, "Aizawl mi hi Krismas dawn hnaiah zanah an bazar nasa a, hei hi keini MC sumdawngte'n kum tluana kan nghahfak ve a ni. Tunah chuan zan dar 9-ah curfew a ni a, zan dar 8-ah dawr khar ngei ngei a ngai. Mi tam zawk hi zanriah ei khamah muangmara dar 7 chho vela rawn bazar ṭhin kha an ni a, tunah chuan khar hma a ṭul si a, a buaithlak khawp mai. Chhunah traffic jam, motor parking awm lo leh hna ṭulna avanga bazar thei lo tan zan hi bazar hun ṭha a ni ṭhin a, zan curfew hi chu sumdawng tan hian a pawi zual bik a ni ber mai," a ti.

Dawr nghaktu Lalruatsangi chuan, "Zan dar 9-a in thleng hman tura inkhar a ṭul a, min dawrtu lam pawh chuti tho chuan an haw hma a ngai a, zan lama inhawn loh ngawt a ni si lo a, curfew hi chu awm lo se kan ziaawm ve tur a ni a, kum hnih dawn kan inhawn theih loh hnua zana curfew hmanga kan sumdawnna an tibuai zel hi chu a zia lo khawp mai," tiin a sawi.