Ni 237 hnua Covid-19 vei hmuh tlem ber ní a thleng

December 19, Pathianni khan Mizoramah Covid-19 vei mi 33 hmuh chhuah a ni a, kumin ni 237 hnua hmuh chhuah tlem ber ní a ni. Nimin khan Covid-19 vangin mi pahnih an thi a; December 18-20 chhungin mi 944 chhuahtir an ni.

Covid-19 vei Pathiannia hmuh thar 33-te chu Rapid Antigen Test hmanga hmuh chhuah vek an ni a, mipa 14 leh hmeichhia 19 an ni. Hmun dang leh hmanraw dang hmangin swab sample endik a ni lo.

Pathiannia hripui vei hmuh zat 33 hi ni 237 hnua Mizorama hmuh chhuah tlem ber ní a ni a, December 19 hmaa hripui vei 33 aia tlem hmuh chhuah hnuhnun ber chu April 25, 2021 kha niin, mi 22 hmuh chhuah a ni.

IDSP record angin, Mizoramah Covid-19 vei 1,39,488 hmuh chhuah a ni tawh a, mipa 67,286 leh hmeichhia 72,202 an ni a, mipa aiin hmeichhia 4,911-in an tam zawk. Nimin tlai dar 5 khan mi 1,37,303 (98.43%) chhuahtir an ni tawh a, mi 533 (0.38%) thi tawhin, enkawl mek mi 1,652 (1.19%) an awm.

December 19, Pathiannia Covid-19 vei hmuh thar mi 33 zingah symptom nei mi 21 an awm a, mi 12 erawh chu symptom nei lo an ni.

Pathiannia swab sample endikna district paruk zingah positivity percentage 10% aia a sanna district pali a awm a, Kolasib, Saitual leh Khawzawl district-ahte endik zawng zawng an positive vek (100%) a, Champhai 12.50% a ni bawk. Lunglei district-ah sample endik ni mahse positive an awm lo a; Siaha, Serchhip, Lawngtlai, Mamit leh Hnahthial district-ah sample endik a ni lo.

Kum 2011 chhiarpui aṭanga chhûtin, Mizorama Covid-19 vei hmuh tawh 1,39,488 chu mi 1,000 zelah hripui vei mi 127 an awm ang a ni a; mi 1,00,000 zela Covid-19 vangin mi 48 an thi tawh ang a ni tih sorkar thuchhuakin a tarlang.

IDSP tarlan danin, December 18 aṭanga nimin tlai dar 5 thleng khan hripui vei dam tawh mi 944 chhuahtir an ni a; district tina chhuak zat chu - Aizawlah mi 498, Serchhipah 117, Khawzawlah 90, Champhaiah 64, Lungleiah 55, Mamitah 41, Hnahthialah 22, Kolasib-ah 21, Lawngtlaiah 17, Siahaah 12 leh Saitualah pasarih an ni.