KHAWTHLIR

CM-in enfiah
Chief minister Zoramthanga chuan nimin zing khan Chaltlang DIET péng leh Ramhlun North inkar kawng zauh hna thawh mek leh MBSE building sak ṭhat mek a hmunah a enfiah a, quarters sakna tura ruahmante a en bawk. CM hi PWD engineer-in-chief Lalmuankima Henry leh hotu dangte'n an ṭawiawm a ni.

MAL hruaitu thar
Mizo Academy of Letters (MAL) chuan December 18, Inrinni khan Synod Conference Centre-ah kum 2022-2023 chhunga office bearer turte an thlang a; president atan Prof. RL Thanmawia leh secretary atan Dr Zoramdinthara te an thlang a ni.

Kuhva phur kal khap
Saitual Bawrhsap VL Hruaizela Khiangte chuan nimin khan thupek chhuahin, Saitual district huam chhung khawi kawngah pawh kuhva phur lirthei tlân khap tlat a nih thu a puang. Thupek hi Ministry of Home Affairs leh Home department-in Moreh (Manipur) leh Zokhawthar aṭanga dan loa kuhva rah lâk luh khap a ṭul thu a sawi anga chhuah a ni.

Seismic broadband Station hawng
Lunglei District Emergency Operation Centre (DEOC)-a lirnghing chungchang zir chianna kháwl, Seismic Broadband Station chu nimin khan Lunglei DC Kulothungan A-in a hawng. Seismic Broadband Station hi Mizoramah hmun pathumah dah a ni a, lirnghing dinhmun chhinchhiahna tur a ni.

Ṭanpuina hlân
AMC Ward XVI councillor R Lalawmpuii chuan nimin khan a biala kum 80 chung lamte hnenah Krismas thilpêk - puan lum a hlân. Mizoram Reds - Official Liverpool Supporters Club pawhin an member-te sum thawh khawm Rs 54,500 chu nimin khan Operations Kingdom Ministry, Phunchawng leh Home for Hope, Durtlang bakah, mi pakhat hnenah an hlan bawk.