NHM-a thawkte'n nawrh an titâwp ; HFW dept-a thawkte nawrh khap a ni

National Health Mission Employees Union, Mizoram (NEUM) chuan an thil phûtah sorkar aṭanga thu lawmawm an dawn avangin December 17, 2021 aṭanga tiam chin awm loa nawrh an kalpui chu nimin zing dar 7 khan an titawp. Hetih lai hian, Mizoram sorkar chuan Health department hnuaia thawkte nawrh khapna thupek December 19, 2021 khan

a tichhuak.

Nimina NEUM thuchhuah chuan, "Kan demand hrang hrang - regularisation, regular taka hlawh lak, medical reimbursement neih leh transfer TA chungchangte bakah, Health department hna lak turah pawh NHM hnuaia thawk mekte tana hamṭhatna tur a ngaihtuah tur thu kan Health minister Dr R Lalthangliana'n min tiam bakah, Health secretary Pu R Lalramnghaka pawhin theihtawp min chhuahpui a tiam a. Kan Minister leh Secretary-te min ngenna leh intiamna hi rintlak turah kan ngai a ni," an ti.

NEUM chuan, "Kan sorkar hotute an intiam anga an hmalakna hmuh tur a awm lo a nih a, kan press release dated 9.12.2021-a kan tarlan anga kan chungchang thu hi Cabinet meeting-in min ngaihtuah vat a nih loh chuan a chhe ber pawh a lo thleng a, harsatna lian zawk a thleng palh a nih pawhin sorkar cho chhuahah kan ngai ang," an ti a; nawrh an tihtawp avangin an lungawi ta vek tihna a ni lo tih an tarlang.

An nawrh chhungin damlo tam takin harsatna an tawh thu an hria a, pawi an tih thu sawiin NEUM chuan, "Ngaihdam kan dil nghal a ni," an ti.

Hetih lai hian Health Secretary chuan December 19, Pathianni zan khan Covid-19 lêngin Mizoram a tihbuai nasat avang leh mihring nunna chhan tura theihtawp chhuah lai a nih avangin Health & Family Welfare department hnuaia thawkte nawrh (strike) khapna thupek a chhuah.

HFW department hnuaia thawkte nawrh khapna thupek hi Mizoram Essential Services Maintenance Act, 1990 Section 3 tlawhchhana chhuah a ni a; thupek zâwm lote chu MESMA Section 6 angin hrem theih a nih thu leh, thupek chu sût a nih loh chuan December 19, 2021 zan dar 7 aṭanga thla ruk chhung nung tur a nih thu tarlan a ni bawk.