Pawl pahnihin Champhai DC an fak

ZPM chuan thuchhuah siamin, Champhai DC Maria CT Zuali’n a mawhphurhna a hlen chhuak chu fakawm an tih thu an tarlang a, “Dan loa sumdawngte Chief Minister-in a thawhpui em ni?” an ti. BJP Mahila Morcha (hmeichhe pawl) pawhin kuhva chungchanga Champhai DC hmalakna an thlàwp thu an puang.

Mizoramah dan loa sumdawngte vangin dan leh hrai palzûtna a thleng reng tih sawiin ZPM chuan, “Harsatna neuh neuh thleng ṭhin chu punlun zelin, December 18, 2021 zanah Kelkang dáiah dan loa phurh ni ngeia hriat kuhva ro chu Champhai Bawrhsapin manin, lirthei panga chu tlanboin an ûm zui a. Police checkgate duty-te chu lirthei tlânbote an lo hmuh leh hmuh loh zâwtin, police-te chuan an púte thu hmu lo chuan an hrilh theih loh thuin an lo chhang niin Zozam Times-in a tarlang,” an ti.

ZPM chuan, “Kan sorkar hian police-te kut a phuar em ni?” tiin, OSD to CM leh IGP-te’n police duty leh kuhvaa sumdawngte chu district bawrhsap hriatpui lohin ro an rèlpui thute social media-ah a than thu an sawi.

Ministry of Home Affairs-in kum 2019 khan Mizoram Chief Secretary hnenah dan loa kuhva rah tawlh chu titawp turin a rawn hriattir a, thuneihna a pe tawh tih sawiin, “He lehkha hmang hian Champhai Bawrhsap hian khapna thupek a chhuah tawh. CM hoa meeting-ah khan dan loa sumdawnna tihtàwp dan tur ni loin, CM hian phalna a pe zawk ta mai em ni tih hi kan zâwt a ni,” an ti.

Border trade (ramria sumdawnna) chu mumal leh felfai taka kalpui theih reng a nih laiin, dan loa sumdawnna kalpui a nih avangin chhiah àwl rûk nasa tak a awm ngeia a lan thu sawiin ZPM chuan, “Dan pawisak lohna tihluar záwnga police lal tak an tih fo leh OSD atana dah thar bakah, CM-te hian he sumdawnna aṭang hian manṭang ei vein an thawhpui ta mai em ni?” an ti a; chhun ênga thil thleng mekte chuan dan leh hrai kenkawh kawnga MNF sorkar hlawhchhamzia a tarlang chiang hlea an ngaih thu an sawi.

ZPM chuan, Mizorama thar ni miah lo, dan loa kuhva lak luh chu Mizorama kuhva huan neite’n harsatna an tawh phah nasa tih sawiin, “Dan loa lak luhte hi Mizoram sorkar kaltlanga MAMCO, Mizoram thar anga certificate an pe chhuak ṭhin nia media lama tarlante hi a fel lo tak zet,” an ti bawk.

BJP Mahila Morcha pawhin thuchhuah siamin, sorkar laipui thu anga kuhva rah tawlh rûk titawp tura hma a la chu an thlàwp thu an tarlang a, “Dan ngai pawimawhtu Mizo hmeichhia bawrhsap kan nei hi kan chhuang a, dan dik cheleka huaisen taka hma lam pan zel turin kan thláwp tlat. Pi Maria hi India rama bawrhsap 700 chuang zinga Central sorkar thu zâwm a, dan dik taka kalpuina ngai pawimawh berah kan puang a ni,” an ti.