Covid-19 vangin 533 thi tawh

Nimin khan tlai dar 5 thlengin Covid-19 vangin mi pahnih a thi a, natna dang nei tel ve ve an ni. Mizoramah Covid-19 vangin mi 533 an thi tawh a, tun December thla bikah mi 36 an thi tawh.

Pathianni zan zanlai pelh hnu, December 20, Thawhṭanni dar 12:20 a.m. khan Lallianzama (97), Phulpui, Aizawl district chu Covid-19 vangin State Refferal Hospital-ah a thi a; Covid-19 vei a ni tih November 26, 2021 khan hmuh chhuah niin, November 27 aṭangin SRH-ah enkawl a ni.

Basanti Limbu (68), Zemabawk pawh nimin zing dar 8 khan hripui vangin SRH-ah a thi a; Covid-19 positive a ni tih December 20, 2021 khan hmuh chhuah a ni a, SRH-ah dah luh nghal a nih thu sorkar thuchhuakin a tarlang.