Sorkar nawr chawp ngai kan nei hi a vanduaithlak - ZPM Ṭhalai

ZPM Ṭhalai chuan thuchhuah siamin, National Health Mission (NHM) hnuaia thawk mi 2,000 chuangte sorkarin a ngaihsak tâwk loh vanga nawrh hial ngaia an awm ṭhin chu pawi an tih thu an tarlang a, “Hripui lèn laia rál hmatáwnga awm NHM-a thawktute ngaihsak zo lo sorkar nawr chawp ngai kan nei hi a vanduaithlak hle,” an ti.

ZPM ṭhalaite chuan, NHM-a thawkte a hun taka hlawh pe tur leh medical re-imbursement leh transfer TA chungchanga an thil phûtte a hlawhtlin theih nan cabinet meeting ko thuai turin Mizoram sorkar an phût a; sorkar laipuiin kum 2011-a thu a chhuah tawh, state sorkar-in plan felfai tak siama kum nga thawk tawh chin dah ngheh (regularise) tura a tih tawh angin, chak zawka hma la turin sorkar an phût bawk.

MNF sorkar chu tun hma aṭangin nawr chawp ngai sorkar a nihna a lang zel tih sawiin ZPM Ṭhalai chuan, “Mipui himna tur leh ṭhat zawkna turah pawh nawr chawp ngaia awm tawh lo turin MNF sorkar kan phût a, mipui himna leh damna turin NHM hnuaia thawkte hian ngaihsak an phû hle a ni,” an ti.