Ruihhlo do a awlsam lo - END Minister

Excise & Narcotics department (END) chuan nimin khan an pisaah ruihhlo dona chungchang sap ṭawnga hlahril (poetry) inphuahsiak an buatsaiha ti ṭhate hnenah lawmman an sem a; END minister Dr K Beichhua’n hmanpuiin, ruihhlo do chu a awlsam loh thu a sawi.

Dr K Beichhua chuan, ruihhlo do chu luh thûk poh leh beidawnna a tam emaw tih tur a nih thu sawiin, “Ruihhlo do hi thil awlsam tak a ni lo. Chutih rual chuan, ruihhlo vanga kan ṭhalaite chhiatna leh tawrhnate hi kan beidawnsan thiang lo. Nang leh kei beidawng ila, tuin nge min do sak ang?” a ti.

END Minister sawi danin, ruihhlo do chungchanga mipui inzirtirna atan National Fund for Control of Drug Abuse aṭanga sum an hmuh hmangin ruihhlo donaa tun hma lama an tih la tih ngai loh, hlahril inphuahsiak an buatsaih a ni.

Poetry inphuahsiak hi hlawm hnihah ṭhen a ni a, category-I chu pawl 9-12 zirlaite tan niin, category-II chu college leh university zirlaite tan a ni thung.

Pakhatnate chu category I-ah T Lalchhuangkima (Nazareth NSS) leh category II-ah Ramalle Ruth Blessy (PUC) an ni. Category I-a pakhatnain Rs. 30,000, pahnihnain Rs. 20,000 leh pathumnain Rs. 10,000 an dawng a; category II-a pakhatnain Rs. 50,000, pahnihnain Rs. 30,000 leh pathumnain Rs. 20,000 an dawng a ni.