Aizawl khawpuia inkhàrkhip chhungin sample 13,092 enfiah, hripui vei 578

COVID-19 chungchanga state nodal officer leh sorkar thupuangtu Dr Pachuau Lalmalsawma chuan, Aizawl khawpuia tun hnaia inkhàrkhip chhungin swab sample 13,092 enfiah aṭangin hripui vei mi 578 hmuh chhuah a nih thu leh, chu'ng zinga 82% chu tualchhunga kái an nih thu a tarlang.

Dr Pachuau Lalmalsawma chuan, inkhàrkhip chhungin AMC huam chhunga positive hmuh chhuah tawh aṭanga contact tracing tih ngai leh sample endik ngaite ngawrh tak a thawh a nih thu a sawi a, "RT-PCR test atan sample lak 11,271 a ni a, RAT hmanga test zat 1,821 a tling," a ti.

Lockdown chhunga Aizawla hripui vei hmuh thar 578-te chu mipa 258 leh hmeichhia 320 an ni a, chu'ngte chu local council (veng) 57-a mite niin, Dinthar, Zemabawk, Salem Vengte chu hmuh tamna veng an ni. Aizawlah LC 83 a awm.

Covid-19 State Nodal Officer tarlan danin, inkhàrkhip chhungin Aizawlah hripui vei mi 578 hmuh chhuah a ni a, chu chu sample test aṭangin 4.41% a ni. Hei hi state dang aiin a sang zawk hle. Inkhàrkhip chhunga hmuh chhuah zinga 35.12% chu natna lang chhuak an ni a, natna lang chhuak lo 64.88% an awm. Hri kài ṭanna hriat loh bik zinga 66.67% chu symptom nei an ni.

Inkhàrkhip chhung vêkin Covid-19 donaa a hmatáwnga awm zingah hripui vei mi 16 hmuh chhuah a ni a, an zinga 75% chu symptom nei an ni. Kum bithliahah, kum 11-20 inkar tam berin, hmuh zawng zawng aṭanga 27.50% an ni a, a tam ber chu sikul naupang an ni. Kum 1 hnuai lam pali, kum upa lam 42 an awm bawk a; a naupang ber thla hnih mi, a upa ber kum 93 a ni.

Dr Pachuau Lalmal­sawma chuan, Aizawlah inkhàrkhip ni lo se, hri kái an tam zual a rinawm thu tarlangin, "Lockdown reng theih a ni lo a, a rem lohna tam tak a awm. Tlawmngai páwl leh kohhrante'n programme pawimawh tak tak an ṭhulh a, sikul hawn pawh tihtawp hial a ni a, mi tinte kan mawhphurhna a kan chian a ngai a ni," a ti.