Mizo mipuite nen ṭhian kan ni - AR DIG

Mizorama Assam Rifles hotu thar, Brig. Digvijay Singh chuan, Mizo mipui leh Assam Rifles chu ṭhian ṭha tak an nih thu sawiin, "Ka hunlaiin he inṭhian ṭhatna hi a hma aia ṭhaa chhawm nun zel ka tum dawn a, in mi ṭawiawmna ka ngen a ni," a ti.

He thu hi nimina 46 Assam Rifles hmuna AR-in NGO Conclave an buatsaihah 23 Sector AR DIG thar hian a sawi a; Central YMA, Mizoram Football Association, Mizo Zirlai Pawl leh Mizo Students' Union hruaitute pawhin he hunah hian thu an sawi.

Brig Digvijay chuan, "Mizoramah ka lo lut a, Covid-19 avangin inkhung hrang tura tih ka ni a, chu chu ka zawm nghal a, kha ta ṭang khan Mizoram inenkawlna fel fai zia ka hmu. He rama chengte leh AR hi ṭhian ṭha an lo ni tawh ṭhin a, tun hma zawng aia inunauna ṭha zawk siam kan tum ang. AR leh mipui inkarah inhmuh thiam lohna tenau a lo awm tawh a nih pawhin tunah chuan engkim siam ṭhat a ni tawh a, boruak ṭha tak hnuaiah kan thawhho ka beisei," a ti.

Assam Rifles DIG chuan a hun chhungin Mizo mipuite nen harsatna nei loa thawh a tum tur thu te, hmun ṭhenkhata AR-in civilian-te laka harsatna an thlen tih an sawi pawh a enfiah tur thu te, ruihhlo leh thil ṭha lo dang tawlh ruk veng tura ṭan an lak zel tur thute a sawi a, chumi atana ṭanho puiah NGO-te a sawm.

Central YMA president Vanlalruata chuan AR lamin thawhhona ṭha nei tura hmalakna an nei chu lawmawm a tih thu sawiin Mizoram nuam zawk a awm theihna tura thawhhopuiah a sawm lêt a, YMA-in ruihhlo leh dan phal loha thil tawlh ruk doa hna an thawhnaah AR nen boruak ṭha taka thawhho a nih theihna tura ṭan lakpuiah a sawm bawk.

MZP president B Vanlaltana pawhin thusawiin AR leh MZP-te thawhho tawhnate a sawi rualin ramria AR sipai ṭhenkhatin zin veivak lirthei an lo dap ṭhin chu MZP-in an ngaimawh thu a sawi chhuak a, mipui tana hnawksaka sipai ṭhenkhat an awm ṭhin thu leh chutiang mite enzui turin DIG hi a chah a, DIG hian harsatna siam an awm leh awm loh enfiah a tum thu a sawi.

MFA honorary secretary Lalnghinglova Hmar pawhin thusawiin tun hma aṭanga AR leh MFA thawhhona a ṭhat thu te, khelmual hman kawngah chauh ni lo Mizo footballer-te sipaia an luh theihna kawngah pawh AR nen an thawhho dante a sawi chhuak a; DIG chuan MFA-te chu a awm chhunga infiamna kawngah chauh ni loin ṭhalai nun siam ṭhatna kawnga thawhhopui a duh thu a sawi lang.

MSU general secretary Samuel Zoramthanpuia chuan AR-in Mizo mipuite nena thawhona ṭha an duh chu lawmawm a tih thu a sawi a, Mizote ṭhian ni awm taka awm zel tura a duh thu a sawi bawk.