Dan loa kuhva tawlh rûk donaa Champhai DC hmalakna an thláwp

Myanmar aṭanga dan loa Mizoram kaltlanga kuhva rah tawlh ruk chungchanga Champhai DC Maria CT Zuali hmalak dan chu Kawrthah South Kuhva Chingtute Society, Champhai Ṭhalai Pawl, MZP Champhai leh Congress party ṭhalaite'n an thlàwp thu nimin khan an puang a; ZPM party leh BJP, Mizoram Pradesh Mahila Morcha ten an thlàwp thu December 20 khan an lo puang tawh bawk.

Kawrthah South Kuhva Chingtute Society (KSKCS) chuan thuchhuah siamin, "Keini kuhva chíngtute tana harsatna tam tak min siamtu, dan loa Myanmar aṭanga kuhva tawlh rûk chungchanga Champhai DC Pi Maria CT Zuali hmalakna hi lawmawm kan tiin kan thláwp tlat. A hmalakna tihṭhuanawp tuma dodalna awm hi pawi kan ti tak meuh a, thil dik lo dodâltu Pi Maria-i hmalakna thláwp turin Mizo mipui kan sáwm a ni," a ti a; dan loa Mizorama lut Burma kuhva titawp tura theihtawp chhuah turin Mizoram sorkar thuneitute an ngen a ni.

KSKCS chuan, Burma kuhva tawlh rûk tihtawp a nih theihna tura theihtawp chhuaha chief minister Zoramthanga leh Prime Minister thlenga memorandum thehluttu Vanramchhuangi chungah an lawm thu an tarlang a; Mizoram sorkar leh sorkar laipui pawhin hma an lak nghal an beisei thu an sawi bawk.

Champhai Ṭhalai Pawl (CṬP) chuan, December 18, 2021 zana Kelkang dáia thil thleng kal zelah dan loa bungraw la luttute'n dan hmanga rorel an phût ngam chu mak an tih thu leh an hriatthiam loh thu an tarlang a, "Burma bungrua ngei a ni tih a chian em em laia huai taka dan rorelna an beisei ngam hi a phênah tute nge awm tih hi kan hre châk tak zet a ni," an ti.

CṬP chuan, "State danga thleng pawh ni se kan tih tur kan ram, Kristian state-ah ngei mai a thleng hi a zia lo kan tiin, hetiang hi thleng nawn tawh lo se kan duh tak zet," an ti a; dan loa sumdawngte'n dan hmanga rorel an phût ngam a nih chuan, dan anga sumdawng turin an phût tih an tarlang.

MZP Headquarters, Champhai chuan, "Champhai hmangaihtu Pi Maria CT Zuali kan nei hi lawmawm kan tiin kan chhuang tak zet a, a hmalaknate hi ṭha kan tiin kan thláwp tlat a ni. Champhai tana a thâ leh zung sên zozaite hi a ropui kan tiin kan chhuang em em a ni," an ti a; theihtawp chhuaha Champhai tana ṭan la zel tur leh hma lam pan zel turin duhsakna an hlân.

Mizoram Pradesh Youth Congress Committee (MPYCC) chuan, dan loa kuhva tawlh rûk donaah sorkar hnathawkte'n dan anga thil kalpui an tum tih sawiin, "Chutih laia chung lama roreltu, sorkar siamtu thil ti thei zawkte aṭanga thuneihna hman sual kawnga thil felhlel hriat tur a awm ta zauh zauh hi pawi kan ti hle," an ti a, tun hnuah thleng tawh lo se an duh thu an tarlang.

MPYCC chuan, dan loa kuhva tawlh rûk chu dan hnuaia fel taka tih a nih theih nan leh dik tak leh huaisen taka hma la turin sorkar an phût a, "Kuhva tawlh chungchanga thil felhlel a awm tih hre renga Mizoram sorkarin a hai der lui tlat hi a mak a. Sorkara thil ti thei tak takte an inhnamhnawih ve ngei a nih dawn hi tih theih tura boruak a awm hi pawi kan ti tak zet a ni," an ti.

ZPM chuan December 20, 2021 khan thuchhuah siamin, Champhai DC Maria CT Zuali’n a mawhphurhna a hlen chhuak chu fakawm an tih thu an tarlang a, "Dan loa sumdawngte Chief Minister-in a thawhpui em ni?" an ti. BJP Mahila Morcha (hmeichhe pawl) pawhin kuhva chungchanga Champhai DC hmalakna an thlàwp thu an puang bawk a ni.