Krismas hmain scho' pek kim beisei

Kum 2020-21 atana post-matric scholarship diltu zirlai 33,798 zinga mi 100 velin an la dawng lo a, Krismas hma ngeia pek kim theih beisei a ni.

Mizoram Scholarship Board (MSB) hotute chuan Vanglaini palai zawhna chhangin, scholarship la dawng lo mi 100 vel an la awma an hriat thu an sawi a, "Scholarship la dawng lo buaipui ngai an la awm nual avangin leave lak pawh kan phal lo. December 23, 2021 thleng pisa kan kái dawn a, Krismas hma hi chuan an dawn kim vek kan beisei," an ti a; nimin bikah bank-te aṭangin zirlaite account-ah scholarship tur Rs 5,00,000 chuang thun a nih thu an dawng tih an sawi.

Scholarship lut nawn (double) an buaipui mek thu leh pawisa eng emaw zat an lak let tawh thu sawiin MSB hotute chuan, “Public Financial Management System (PFMS) kan hman hnuah hian pawisa lut double a awm thei lo tih hi kan hriat dan leh PFMS hotute hriat dan pawh a ni a, mahse, pawisa lut double hi 3,000 vel a awm niin kan hria,” an ti.

Pawisa lut nawnte account neihna bank-te nen thawhhona ṭha tak an neih thu sawiin MSB hotute chuan, “Bank hotute kan bia a, pawisa lut tur zat aia tam lutte account aṭanga recover tura kan tih angin eng emaw zat an rawn thawn lêt tawh,” an ti a; bank aṭanga pawisa la chhuak hmante chu mimala an ṭhìn dawn thu an sawi.