ZMC zirlaite hostel thar pahnih hawng

Zoram Medical College (ZMC)-a MBBS zirlaite awmna tur Ladies Hostel leh Gents Hostel thar chu nimin khan Health minister Dr R Lalthangliana’n a hawng a, mipa leh hmeichhe hostel dang pakhat ve ve sakna tur lungphùm a phúm nghal bawk.

Dr R Lalthangliana chuan, hriselna lam ruhrel din kawngah sorkarin nasa lehzualin ṭan an la zel dawn tih a sawi a; tun hnaia Apollo Hospital, Kolkata thuneitute a kawm thu sawiin, “An hospital-a doctor thiam, super-speciality doctor-te regular taka Mizorama rawn kala damlo rawn en ṭhin turin ka ngen a, rem an tih thu an sawi,” a ti.

ZMC-a zirlai mipa leh hmeichhia hostel thar hi NEDP sum cheng nuai 500 ve ve sêngin October 6, 2018-ah sak ṭan niin, Zothan Consultancy Services-in an sa a, August 15, 2020 sak zawh a ni. Hostel-ah hian khum 72 ve ve a awm.

Minister-in hostel dang pahnih sakna tur lung a phûm chu NESIDS, DoNER aṭanga sum hmuh nuai 1,000 ve ve senga sak tur a ni. Hmeichhe hostel chu October 27, 2023-a sak zawh tur niin, David Zohmachhuana, Zuangtuiin a sa dawn a, mipa hostel chu October 29, 2023-a sak zawh tur niin, Ngurzamlova, Khuangpuilam, Kolasib-in a sa dawn a ni.