Multi Level Car Parking hawn a ni

Secretariat building bula Multi Level Car Parking sak thar chu nimin khan deputy chief minister Tawnluia'n a hawng. Car parking building hi cheng nuai 3,961 sénga sak a ni a, lirthei tê (LMV) 354 leh two wheeler 224 dah theihna tur a ni.

UDPA minister Tawnluia chuan UDPA minister hmasa Zodintluanga Ralte chungah lawmthu sawiin, "Multi Level Car Parking hi kan vaia ṭan khawmna vanga hlawhtling a ni a, sorkar hmasain bul a lo ṭan tawh chu hlamchhiah mai loin, tihpuitlinna turin tun sorkarin theihtawp a chhuah a, thil ṭha a nih avangin chhunzawm a ni," a ti a; project phuailuai erawh chhunzawm theih a ni ṭhin lo tih a sawi.

Tun hmain lirthei dahna (parking) a awm meuh lo tih sawiin Tawnluia chuan, "Khawpui a ṭhang zel a, parking hmun âwl kan mamawh belh zel. Urbanization-ah kan ṭhang hle tih a hriat," a ti a; khawpui hmasawnna leh mawhphurhtu UDPA department-in nasa taka hma a lak thu leh Aizawl Sustainable Urban Transport Project lian tham tak an buaipui mek thu a sawi bawk.

Hawnna inkhawm hi UDPA secretary K Lalthawmmawia'n a kaihruai a; report-a tarlan danin, Multi Level Car Parking sakna tur hian DoNER aṭangin kum 2017 khan cheng nuai 3,601 hmuh a ni a, Mizoram sorkar tum ve tur chu cheng nuai 360 a ni. Turnkey basis-in contractor atan open tender hmangin Vikas & Associates, Delhi thlan niin, July 12, 2018-ah a lungphùm phùm a ni a; General Administration department-in an enkawl zui ang.

Hawnna inkhawmah hian minister K Lalrinliana bakah MLA paruk - Zodintluanga Ralte, Prof. F Lalnunmawia, L Thangmawia, C Lalmuanpuia, Lalchhuanthanga leh Zothantluanga te an tel a ni.