Kuhva sumdawnnaah dan bawhchhia an awm chuan hrem kan phût - ZPM
Zoram Peoples' Movement (ZPM) hruaitute chuan nimin khan Aizawl Press Club-ah thuthar thehdarhtute an kâwm a; kuhva hmanga sumdawnnaah dan bawhchhiatna a awm chuan dan bawhchhetu hrem an phût thu an sawi.
ZPM working president K Sapdanga chuan, Ministry of Home Affairs-in kum 2019 khan Mizoram Chief Secretary hnenah dan loa kuhva rah tawlh titawp turin a hriattir a, thuneihna a pe tih sawiin, "He lehkha hmang hian Champhai Bawrhsap hian khapna thupek a chhuah tawh. Border trade hi mumal leh felfai taka kalpui theih a nih laia dan loa sumdawnna kalpui a nih avangin chhiah àwl rûkna nasa tak a awm ngei a ni tih a lang," a ti.
Khawchhak aṭanga dan loa kuhva phurh tihtawp dan tur Chief Minister hoa rèl a nih hnu lawk, December 14, 2021 zan aṭangin Champhai aṭangin kuhva ro chu kawngpui pangngaiah phurh a nih thu chanchin tharah puan a ni tih sawiin Sapdanga chuan, “December 16 aṭang phei chuan ni tin trip 30 kal phal a nih thu chanchin tharah puan zui a ni. Dan palzût zel a nih avangin vawiinah Zoram pum a déng chhuak a ni,” a ti a; dan bawhchhetute zawkin dan kengkawhtute lakah FIR an thehlut ta hial tih a sawi.
ZPM Working President chuan, kuhva hmanga sumdawnna chungchanga thil thleng mekte’n dan leh hrai kenkawh kawnga MNF sorkar hlawhchhamzia a tichiang hlea an ngaih thu sawiin, “Ram pahnih insumdawn tawnna hi hlâwk zawk leh awmze nei zawka dan hnuaia kalpui a nih theihna tur leh sumdawngte an kal theihna tura hma la turin sorkar kan ngen a ni. Dan bawhchhiatna tipunluntu hi thuneitu sang lam niin kan ngai,” a ti.
ZPM hruaitute thusawi
1) Mizoram tibuaitu kuhva sumdawnna hi Mizoram hian ram dan zâwmin kalpui rawh se.
2) Kuhva sumdawnna tuna kalpui danah hian dan bawhchhiatna a awm chuan, state sorkarin chhui chhuak ngei se la, dan bawhchhia chu hrem ni rawh se.
3) Kuhvaa sumdawn dan tur sorkar laipuiin 2019-a thuchhuah a siam, official-te'n kenkawh an tum a, state sorkar thuneitu sang aṭangin harsatna an tâwk tlat ṭhin nia lang hi mak kan ti a, kan dem.
4) ZPM a sorkar hunah chuan kuhvaa sumdawnna hi sorkar leh mipuiin awmze neia a hlâwkpui theihna turin ram dan hnuaiah, ram dan zâwm thlapa kalpui a ni ang.