MPCC-in rin ngam sorkar siam an tum ; 'NLUP kan kalpui ka ring tawh lo' - MPCC President

Mizoram Pradesh Congress Committee (MPCC) office bearer tharte chuan nimin khan Congress Bhavan-ah thuthar thehdarhtute an kâwm a; MPCC president Lalsawta chuan, Mizoram mipui rin ngam sorkar ṭha siam an tum thu sawiin, "NLUP kan kalpui ka ring tawh lo," a ti.

Lalsawta chuan, NLUP an kalpui a rin tawh loh thu sawiin, "A sema sem zawng pawhin kal kan tum lutuk lo. Puih ngaite erawh an mamawhna záwnah kan pui ang," a ti a; mahnia ding chhuak thei lo, retheite an dinchhuah vena tur an ruahman dawn thu leh mi taima leh rinawmte tan sorkarin remchanna siamin 'Ṭâng puihna' an buatsaih dawn thu a sawi a ni.

MPCC President chuan, ram hruai turin hmathlir mumal tak neih a ṭul thu sawiin, "Hmathlir nei tih kan sawi hian hmathlir neih ṭeuh ringawt lam a ni lo. Hmathlir nei chuan thil a chhui chiang a, a ngaihtuah ngun tur a ni," a ti a; Mizoram tan leh mipui tana ṭha turah chuan huaisen takin din ngheh tlat an tum thu a sawi.

MPCC President thusawi
1) A sem záwng ni loin, puih ngaihte an mamawhnaah kan pui ang.
2) Zoram tan leh mipui tana ṭha turah chuan huaisen taka din kan tum.
3) Voter lei theiha ngaitu mipui lakah kan ram dah kan phal lo.
4) Sorkar hnathawkte hlawh leh an pension a hun taka pek kan ngai pawimawh ang.
5) Sorkar hnathawkte pension chi hrang hrang Mizoram sorkarin cheng vbc. 113.28 a ba mek.
6) Ṭul loa sum hman a nih laiin a pawimawha hman tur a awm lo.

Mahnia dingchhuak thei lo, retheite an din chhuahna tur an ruahman tur thu sawiin Lalsawta chuan, “NLUP kan kalpui ka ring tawh lo. NLUP kha thil ṭha tak a ni a, kan beisei ang a pha lo tih erawh kan pha lo. Sem ang zawng chuan kal kan tum lutuk tawh lo. Puih ngaite erawh an mamawhna zâwnah ṭanpui kan tum,” a ti.

Mi taima leh rinawmte tan sorkarin remchànna siamin ‘ṭang puihna’ an buatsaih tur thu sawiin MPCC President chuan, “An tana harsatna siamtu ni loin, awlsamna siamtu nih kan tum,” a ti a; mithiamte ráwn chungin ruahmanna ṭha tak siam an tum thu a sawi.

Sorkar tibuai ṭhintu eirûkna a awm lohna turin a lêr aṭangin mipui entawn tlak sorkar siam an tum thu sawiin Sawta chuan, “Hei hi a tih theih tih kan hria. Corruption nasatna ṭhin hmunahte pawh sorkar an ṭhat chuan eirukna an titawp thei. Ram tana harsatna siamtute chu kan su ngam ang,” a ti.

MPCC President chuan, kum 2023-a inthlanpuiah voter-te lei theiha ngaitu politician-te kutah Mizoram dah an phal dawn lo tih sawiin, “Hemi kawnga kan thawhpui theih apiangte nen ṭangrualin ram chhan turin kan do ang,” a ti a; state dang ang maia politician neinungte chauh dinchanna ramah Mizoram siam an phal dawn loh thu a sawi.

Lalsawta chuan, sorkar hnathawkte chu ram rorelnaah hna pawimawh tak thawktu an nih thu leh hlawh leh pension a hun taka pek an ngaih pawimawh tur thu sawiin, “Sorkarin an chanvo tam tak a batsak avangin chhungkaw tam tak an mangang,” a ti a; sorkar hnathawk pension chi hrang hrang Mizoram sorkarin cheng vbc. 113.28 a batsak mek thu sawiin, “Covid-19 karah pawh uluk taka sum hman a nih chuan sorkarin sum a nei tam tâwk viauin ka hria,” a ti.

Congress President chuan, pension kum tin a pun ṭhin laiin, kuminah chuan budget-a sum dah a pun loh thu sawiin, “Kum hmasa kha cheng nuai 2,064-in a pha lo a, pension hlawh pek an tum lo a ni ang. Raw-mi leina tur, artificial grass phahna tur leh ṭul miah lo SEDP board 14 an nei thei reng,” a ti a; pawimawha sum hman tur a awm lo chu sorkarin sum a enkawl thiam lo tih bak puh tur dang a awm loh thu a sawi.

MPCC vice president Lal Thanzara chuan, sorkarna an chan laiin State Referral Hospital an tihpuitlin bakah medical college an din thu sawiin, “Covid-19 a lên hnua ṭangkai taka hman a ni hi lawmawm kan ti tak zet. SRH bakah hian Aizawl Civil Hospital leh district hospital-te pawh kan hun lai khan tihchangtlun a ni,” a ti.

MPCC treasurer Zodintluanga Ralte chuan, MNF chu sorkarna siam nawn an tum tawh loa a lan thu sawiin, “Minister-te sum ûm ringawtin an tlân emaw tih tur a ni. Dan leh thupek kengkawhtu DC lakah FIR-te thehluh ngamna sorkar an din a ni,” a ti a; MNF sorkarah mipui beiseina a tàwp tawh thu a sawi.