KHAWTHLIR

Charge hlan
Kum 2019-2021 chhung Central YMA hruaitute chuan Thawhṭanni khan kum 2021-2023 atana hruaitu thlan tharte hnenah charge an hlan. Hetihlai hian kumin Krismas leh 2022 kum thar vuakvêtah Central YMA Office khâr a ni dawn a; December 23-ah khâr a ni ang a, January 6, 2022-ah hawn leh a ni ang.

Thisen pe
KṬP, Zuangtui Pastor Bial chuan nimin khan Synod Hospital Blood Bank-ah thisen unit 27 an pe a, petute mipa 21 leh hmeichhia paruk an ni.

Pipe phúm dawn
December 27, Thawhṭanni zing dar 6-8 inkarah SIPMIU-in Chanmari-Chaltlang inkar kawngpuiah tui pipe an phúm dawn a, hei vang hian kawngpui zatve khâr a ni dawn.

Anganwadi hawng
Lunglei DC Kulothungan A chuan nimin khan Central Warehousing Corporation, Guwahati CSR kaltlanga ruahman Lunglei khawpuia Building as Learning Aid (BaLA) Anganwadi Centre pathum - Lungpuizawl-II, Bazar Veng-III leh Rahsi Veng-I centre-te a hawng.

Sangha man khap
Fisheries department chuan Tuirial Hydro Electric Power Project leh Serlui-B Hydro Electric Power tuikhuahah dan loa hmanraw hrang hrang (bomb, dynamo, lên, adt.) hmanga sangha man an awm ṭhin tih hriat a nih thu an tarlang a; dan loa sangha man khap a nih thu leh dan bawhchhiate chu Mizoram Fisheries (Amendment) Act 2016 Section 6(2) hmanga hrem theih an nih thu an puang.

Hmanrua sem
Khawzawl DC CC Lalchhuangkima chuan nimin khan State Disaster Response Fund (SDRF) aṭanga Covid-19 dona hmanraw hrang hrang leite chu bungrua lei a nih laia an district chhunga Covid-19 positive tamna hmunahte a sem. Hmanrua semte hi PPE kit, oxymeter, BP monitor, digital thermometer, facemask, steamer leh hand sanitizer-te an ni.